Ցուցահանդես` նվիրված Գայանե Խաչատրյանի հիշատակին

Վրաստանի Հայերի ազգային կոնգրեսը եւ Ժամանակակից արվեստի թանգարանը հրավիրում են այցելել թբիլիսահայ նկարչուհի Գայանե Խաչատրյանի հիշատակին նվիրված ցուցահանդեսին, որը կգործի մինչեւ հուլիսի 15-ը: Նկարչուհու կտավների կողքին կցուցադրվեն նաեւ լուսանկարչական արվեստի հայտնի վարպետների կողմից արված` նրա ֆոտոդիմանկարները:

Գայանե Խաչատրյանի նկարներով հիացել են Մարտիրոս Սարյանը, Բելլա Ախմադուլինան, Տոնինո Գուերան, Անդրեյ Տարկովսկին, Վլադիմիր Սպիվակովը, Մայա Պլիսեցկայան եւ այլք: Նկարչուհու մեծ բարեկամն է եղել եւ մշտապես նրան աջակցել է Սերգեյ Փարաջանովը: 

Գայանե Խաչատրյանի կտավները զարդարում են Իտալիայի, Հոլանդիայի, Վրաստանի, Ֆրանսիայի, Հայաստանի, Ռուսաստանի, Իսրայելի, Ավստրիայի, ԱՄՆ-ի հեղինակավոր պատկերասրահները եւ մասնավոր հավաքածուներ:

Նկարչուհին վախճանվել է մայիսի 1-ին Թբիլիսիում` 66 տարեկան հասակում եւ հանգչում է Թբիլիսիի Խոջիվանքի` հայ գրողների եւ հասարակական գործիչների պանթեոնում: