Ոչ ոք չի մոռացվել, ոչինչ չի մոռացվել

Այսօր ԵՊՀ գիտխորհրդի դահլիճում տեղի ունեցավ «Երևանի պետական համալսարանը Արցախյան գոյապայքարում» գրքի շնորհանդեսը:

Գիրքը տպագրվել է ԵՊՀ պատմության թանգարանի և հայագիտական հետազոտությունների ինստիտուտի հետ համատեղ, նվիրված է ԵՊՀ այն 27 համալսարանական ազատամարտիկներին, ովքեր, թողնելով ուսանողական լսարանն ու գիտամանկավարժական աշխատանքը, մեկնեցին ազատագրելու հայրենի հողը: Գրքում տեղ են գտել ազատամարտիկներին վերաբերող կենսագրական տեղեկություններ, հուշեր, որոնց զգալի մասն առաջին անգամ է հրատարակվում:

ԵՊՀ պատմության թանգարանում տեղի ունեցավ նաև «Համալսարանականները Արցախյան պատերազմում» խորագրով ցուցահանդեսի բացումը և նույն խորագրով գրքույկի շնորհանդեսը: Ցուցահանդեսին ներկայացված են համալսարանական ազատամարտիկների անձնական իրերը, նրանց վերաբերող լուսանկարներ, ինչպես նաև նյութեր, որոնք մանրամասն ներկայացնում են համալսարանի դերն Արցախյան գոյամարտում: