Ապրիլյան պատերազմից երկու տարի անց. ոչ ոք չի մոռացվել

Ապրիլյան քառօրյա պատերազմից երկու տարի է անցել: 2016-ի ապրիլի 1-ի լույս 2-ի գիշերը ղարաբաղա-ադրբեջանական շփման գծի ողջ երկայնքով հակառակորդը ձեռնարկեց լայնամասշտաբ հարձակողական գործողություններ: Առավել թեժ մարտեր են ընթացել արցախա-ադրբեջանական շփման գծի հարավային (Հադրութ) և հյուսիսարևելյան (Մարտակերտ) ուղղություններում։

Ադրբեջանը փորձեց արագ հաղթանակի հասնել՝ առաջին գծում կուտակած զինտեխնիկայի միջոցով փորձ կատարելով ճեղքել մեր ինքնապաշտպանությունը, այնուհետև միջանցքով տանկերի միջոցով ներթափանցել թիկունք և առաջ շարժվել դեպի Արցախի խորքը:  Ադրբեջանը ձախողեց իր ծրագիրը:

Ադրբեջանական կողմը հարվածներ էր հասցնում նաև խաղաղ բնակավայրերին, ինչի հետևանքով ապրիլի 2-ին զոհվեցին և վիրավորվեցին նաև երեխաներ. դպրոց գնալու ճանապարհին ականակոծության հետևանքով Արցախի Մարտունու շրջանի Զորավան գյուղում զոհվեց 12-ամյա Վաղինակ Գրիգորյանը, ևս երկու երեխա ծանր վնասվածքներով տեղափոխվեցին հիվանդանոց:

Ապրիլյան պատերազմի ընթացքում հայկական զինված ուժերից զոհվեց 110, վիրավորվեց 121 զինծառայող և կամավորական: