Հայկական սուրբ քարը` Փարիզում

2011 թ. հունիսի 15-24-ը Փարիզում` ՅՈՒՆԵՍԿՕ-ի կենտրոնակայանում, կազմակերպվելու է «Խաչքարի արվեստ` հայկական սուրբ քարեր» խորագրով ցուցահանդեսը:

Ինչպես տեղեկացնում են մշակույթի նախարարության հասարակայնության հետ կապերի վարչությունից, ցուցադրությունում ներառվել են տարբեր ժամանակներում և պատմական Հայաստանի տարբեր շրջաններում կերտված լավագույն խաչքարերի շուրջ 60 լուսանկարներ, ինչպես նաև խաչքարային մշակույթի տարածման արեալներն ընդգրկող քարտեզ ու խաչքարի մշակույթը լուսաբանող գիտական բացատրագրեր:

ՀՀ մշակույթի նախարարի տեղակալ Արև Սամուելյանի գլխավորած հայկական պատվիրակության կազմում Փարիզ են մեկնել նաև Ս. Փարաջանովի տուն-թանգարանի տնօրեն Զավեն Սարգսյանը, ԵՊՀ մշակութաբանության ամբիոնի վարիչ Լևոն Չուգասզյանը, նախարարության աշխատակազմի մշակութային ժառանգության և ժողովրդական արհեստների վարչության գլխավոր մասնագետ Երանուհի Մարգարյանը:

Միջոցառմանը կմասնակցի նաև Փարիզից արվեստի պատմության դոկտոր Պատրիկ Դոնաբեդյանը:

Ցուցահանդեսի ընթացքում նկարիչ-քանդակագործ Ռոբերտ Մինասյանը տեղում, քարի վրա աշխատելով, այցելուներին կներկայացնի խաչքարի կերտման տեխնիկան ու վարպետությունը:

Ցուցահանդեսի պաշտոնական բացումը տեղի կունենա այսօր` հունիսի 15-ին, ժամը 18.30-ին:

Այս օրերին Փարիզի ՅՈՒՆԵՍԿՕ-ի կենտրոնակայանում կընթանան նաև ՅՈՒՆԵՍԿՕ-ի «Մշակույթի և բնության համաշխարհային ժառանգության պաշտպանության մասին» կոնվենցիայի միջկառավարական կոմիտեի 35-րդ և «Մշակութային ինքնաարտահայտումների բազմազանության պաշտպանության և խրախուսման մասին» կոնվենցիայի նստաշրջանները, որոնց կմասնակցեն ՅՈՒՆԵՍԿՕ-ին անդամակցող 100-ից ավելի պետությունների ներկայացուցիչներ:

Հայաստանը կներկայացնեն ՀՀ մշակույթի նախարարի տեղակալ Արև Սամուելյանը, «Պատմամշակութային արգելոց թանգարանների և պատմական միջավայրի պահպանության ծառայության» տնօրենի տեղակալ Արտաշես Առաքելյանը և ՅՈՒՆԵՍԿՕ-ում ՀՀ մշտական ներկայացուցչության աշխատակիցները: