Հուշագիրը կլուծի հայ բեռնափոխադրողների խնդիրները

Ի տարբերություն հայկական մեքենաների` թուրքական բեռնատարներն անարգել կարողանում են հատել հայ-վրացական սահմանը: Մեր բեռնափոխադրողները, անգամ Տրանսպորտի նախարարների եվրոպական կոնֆերանսի եւ Սեւծովյան տնտեսական համագործակցության թույլտվությունների պարագայում, միջազգային բեռնափոխադրումների քարտերով չեն կարողանում մուտք գործել Թուրքիայի տարածք կամ տարանցիկ բեռնափոխադրումներ իրականացնել:

Հայաստանի տրանսպորտի եւ կապի նախարար Մանուկ Վարդանյանն այսօր լրագրողներին հայտնեց, որ պաշտոնական Երեւանն այդ մասին բազմիցս տեղեկացրել է միջազգային կազմակերպություններին, այդ թվում` Ավտոտրանսպորտի միջազգային միությանը (IRU):

Հայաստանի միջազգային բեռնափոխադրումների ասոցիացիայի նախագահ Հերբերտ Համբարձումյանի խոսքերով` Հայաստանը եւ Թուրքիան IRU-ի անդամ են, իսկ այսօր Հայաստանի եւ IRU-ի միջեւ ստորագրված հուշագիրը Թուրքիայի հետ բանակցություններում մեր ղեկավարությանը մանեւրելու հնարավորություն է տալիս:

«Հուշագիրը հնարավորություն կտա հայ բեռնափոխադրողներին դրսում ծագած խնդիրներին լուծում տալ»,- ընդգծեց Հ. Համբարձումյանը:

Այսպիսով` հայ բեռնափոխադրողները հույս են տածում, որ ՀՀ տրանսպորտի եւ կապի նախարարության եւ IRU-ի միջեւ կնքված հուշագիրը (ՀՀ տարածքով Ասիայի, Եվրոպայի եւ հիմնական համաշխարհային շուկաների միջեւ ավտոտրանսպորտային փոխադրումների զարգացման մասին) հնարավորություն կտա հայկական բեռնատարներին մուտք գործել Թուրքիա: