Բեռնափոխադրողների նկատմամբ տուգանք է կիրառվել

ՀՀ տնտեսական մրցակցության պաշտպանության պետական հանձնաժողովն այսօր որոշում է կայացրել բեռնափոխադրող չորս ընկերությունների նկատմամբ տուգանք կիրառել. «Չորս ընկեր» ընկերությունը տուգանվել է ավելի քան 55 մլն դրամ, «ՍՕՀՕ» ընկերությունը՝ 30 մլն դրամ, «Պրոֆ իմպրոտեքսը»` 10 մլն դրամ,  «Նանիսը»` ավելի քան 5 մլն դրամ:

Հանձնաժողովը տնտեսվարողներին պարտադրել է տասնօրյա ժամկետում իրեն ներկայացնել տուգանքի վճարումը հավաստող տեղեկատվություն, նաեւ պարտավորվել հետագայում բացառել օրենքի խախտումները:

Հիշեցնենք, որ տարեսկզբին վերոհիշյալ ընկերությունները բարձրացրել էին Թուրքիայից եւ Չինաստանից ներկրվող ապրանքների համար գանձվող վճարի գները, ինչն էլ կառավարության շենքի մոտ բողոքի ակցիաների պատճառ էր դարձել:

Բեռնափոխադրողները, օրինակ, Թուրքիայից ներկրվող ապրանքի մեկ կիլոգրամի համար առեւտրականներից գանձել էին 8 դոլար` 4 դոլարի փոխարեն, իսկ Չինաստանից ներկրվող ապրանքի համար`  14 դոլար 7-ի փոխարեն: Բեռնափոխադրող ընկերություները պատճառաբանել էին, թե մաքսային վճարները թանկացել են, սակայն Պետեկամուտների կոմիտեից ստացված տեղեկատվությամբ` Թուրքիայից եւ Չինաստանից ներկրվող ապրանքների դիմաց գանձվող մաքսավճարների չափի փոփոխություն չի եղել:

Մաքսային հսկողության և հաշվապահական հաշվառման փաստաթղթերի, իրացման գրքերի եւ այլ փաստաթղթերի ուսումնասիրության հիման վրա հանձնաժողովը ապացուցված է համարում այն փաստը, որ բեռնափոխադրողները հունվարին միաժամանակ` փոխադարձ համաձայնությամբ բարձրացրել են գները, ինչը ոչ մի տնտեսական հիմնավորում չունի: