ՀՅԴ-ն դեմ է ընտրությունների անպատեհ առաջաձգմանը

Սերժ Սարգսյանը արտահերթ նախագահական ընտրությունների չի գնա. «Ազատություն» ռադիոկայանի հետ զրույցում ասել է ՀՅԴ Բյուրոյի ներկայացուցիչ Հրանտ Մարգարյանը` երկյուղելով, սակայն, որ ՀԱԿ-իշխանություն երկխոսության արդյունքում հնարավոր են արտահերթ խորհրդարանական ընտրությունները:

Նա հավելել է, որ Դաշնակցությունը որեւէ ընտրության դեմ չէ, բայց նպատակահարմար չի համարում «ընտրության անպատեհ առաջաձգումը»:

«Ուժերի պատրաստվածության հարց կա: Օրինակ` հանկարծ որոշվի, որ երկու ամսից ընտրություններ են լինելու: Դա կնշանակի հանկարծկիի բերել ողջ քաղաքական դաշտը եւ այն ուժերին, որ ավելի մեծ հնարավորություն ունեն անակնկալ ընտրություններ անցկացնելու, իսկ այս պարագայում դրանք իշխանական ուժերն են, մյուսների համեմատությամբ կհայտնվեն առավել շահեկան դիրքերում»,- ասել է ՀՅԴ Բյուրոյի ներկայացուցիչը:

Նա ընդգծել է, որ «եթե երկխոսության արդյունքը լինեն առաջաձգված ընտրությունները, ապա կհամարեմ, որ այդ երկխոսությունն իսկապես դավադրություն էր` ուղղված ժողովրդի դեմ»: