ՀԱՅԱՑՔ. Հեռացման հրաման չկա, բայց գործի չեն գնում

Սա էն երկիրն է, որտեղ ոչ մի օրենք չի գործում. այս խոսքերն էին երեկ կրկնում կառավարության շենքի առջեւ բողոքի դուրս եկած գյուղատնտեսության նախարարության սննդի անվտանգության եւ անասնաբուժության պետական տեսչության նախկին աշխատակիցները:

Մոտ երկու ամիս առաջ լուծարված այս տեսչության աշխատակիցները պնդում են, որ իրենց աշխատանքից անօրինական են հեռացրել:

«Մինչեւ հիմա հեռացման հրաման չկա, բայց արդեն երկու ամիս է` մեզ ասել են` աշխատանքի չգաք, աշխատավարձ էլ չենք ստանում»,- պատմել են բողոքավորները:

Նշենք, որ, կառավարության որոշմամբ, գյուղատնտեսության նախարարության սննդի եւ բուսասանիտարիայի պետական տեսչությունների վերամիավորման արդյունքում ստեղծվել է սննդամթերքի անվտանգության պետական ծառայությունը, որի նոր պետ Գրիգոր Գրիգորյանը, բառի բուն իմաստով, կադրային ջարդ է իրականացրել` համակարգից հեռացնելով անգամ փորձառու եւ վաստակաշատ մասնագետներին:

Դեռ մեկ ամիս առաջ խոսվում էր այն մասին, որ աշխատանքից ազատվել է շուրջ 70 մարդ, սակայն տեսչության նախկին աշխատակիցները մեզ տեղեկացրին, որ օրեցօր գործազուրկների բանակն ավելանում է, քանի որ նոր տնօրենն ամեն շաբաթ փոփոխություն է կատարում:

Ասում են, թե Գրիգոր Գրիգորյանն իր մարդկանց է հավաքել շուրջը` առանց հաշվի առնելու նրանց մասնագիտական հմտությունները:

Երեկ կառավարությունում խոստացան մոտ օրերս ընդունել բողոքի դուրս եկած տեսչության նախկին աշխատակիցներին եւ լսել նրանց խնդիրը: