Խոսող շներ` պատերազմում հաղթելու համար

Ֆաշիստական Գերմանիայի ղեկավարությունը ենթադրում էր, որ շներն էլ մարդկանց հավասար մտավոր կարողություններ ունեն, եւ լրջորեն փորձում էր ստեղծել խոսող շների բանակ, որոնք պետք է օգնեին Հիտլերին հաղթանակ տանել պատերազմում: Այդ մասին իր Amazing Dogs աշխատության մեջ գրում է Քարդիֆի համալսարանից Յան Բոնդերսոնը:

Հիտլերի ամենահավանած նախագծերից մեկի` «Կենդանիների լեզուների դպրոցի» ղեկավար Մարգարետ Շմիդտը 30-ականներից սկսած խոսել, կարդալ ու գրել էր սովորեցնում իր չորքոտանի սաներին: Նրա ամենամեծ հաջողությունն այն էր, որ որոշ շներ կարողանում էին ճանաչել գերմանական այբուբենի տառերը` թաթով ցույց տալով դրանք:

Մի հովվապահ շուն նույնիսկ սովորել էր, մարդկանց նմանակելով, «Ո՞վ է Ադոլֆ Հիտլերը» հարցին իբր պատասխանում էր` «Իմ ֆյուրերը»:

Դպրոցի ամեն հայտնի շնիկը էրդելտերիեր Ռալֆն էր: Նա իբր կարողանում էր փիլիսոփայական բանավեճեր վարել, խոսել տարբեր լեզուներով, բանաստեղծություններ էր գրում:

Ռեյխի ղեկավարությունը հույս է ունեցել, որ խոսող եւ գրող շներին հնարավոր կլինի օգտագործել համակենտրոնացման ճամբարներում, իսկ ազատված զինվորներին` ուղարկել ռազմաճակատ: