National Geographic-ը Մեծամորի ատոմակայանի մասին

Հայաստանի սիրելի եւ տխրեցնող ազգային խորհրդանիշ Արարատ լեռան ստվերում է գտնվում  Մեծամորի 31-ամյա ատոմակայանը. գրում է National Geographic ամսագիրը, որը Ճապոնիայի «Ֆուկուսիմա-1» ատոմակայանի վթարից հետո գնահատում է աշխարհի մյուս ատոմակայանների վտանգավորության աստիճանը:

«Մեծամորը ամենահզոր կայաններից մեկն է, որի ատոմային ռեակտորները կառուցվել են առանց կառավարման տարրական մեխանիզմների»,- նշում է ամսագիրը:

Յոթ տարի առաջ Եվրամիությունն այս ատոմակայանը որակեց որպես «տարածաշրջանային վտանգ» եւ Հայաստանի կառավարությանն առաջարկեց 200 միլիոն եվրո` այն փակելու համար, սակայն Հայաստանը հրաժարվեց:

Իսկ ահա ԱՄՆ կառավարությունը եկել է այն եզրահանգմանը, որ «ծերացող եւ վտանգավոր» ատոմակայանի փոխարեն հարկավոր է նորը կառուցել: Մինչեւ 2016 թվականը նույն տեղում նոր ատոմակայան կառուցելու աշխատանքներն արդեն ընթացքի մեջ են:

Հայաստանն իր էլեկտրաէներգիայի մոտ 40%-ը ստանում է ատոմակայանից: Սա զգալի առավելություն է այն դեպքում, երբ հարեւան երկրների կողմից պետությունը մեկուսացված է, եւ էներգիա ստանալու այլ աղբյուրներ չկան:

National Geographic-ը ներկայացնում է նաեւ ատոմակայանի փակման եւ վերաբացման պատմությունը: