Թուրք հետախույզներն ընդդեմ "հայկական անջատողականության"

Թուրքիայի ոստիկանության կազմում գործող գաղտնի հետախուզական կազմակերպությանը հանձնարարվել է պայքարել «հայկական անջատողականության» դեմ. տեղեկացնում է թուրքական «Թարաֆ» թերթը` մեջբերելով WikiLeaks-ի հրապարակած` 2004 թվականով թվագրվող փաստաթուղթը, որը պետդեպարտամենտ էր ուղարկել Անկարայում ԱՄՆ դեսպանության նախկին ռազմական կցորդ Ռոբերտ Դոյչը:

Ռազմական հետախուզությունում 12 տարի աշխատած իր թուրքական աղբյուրի հետ զրույցում Դոյչը պարզել է, որ JİTEM կոչված գաղտնի կազմակերպության աշխատակիցներին հանձնարարվել է հարավարեւելյան Անատոլիայում պայքար մղել «հայկական անջատողականության» դեմ, ինչը տարակուսանք է առաջացրել. «Չէ՞ որ այնտեղ մի բուռ հայ է մնացել»:

Սակայն բացատրվել է, որ շատ հայեր Հայոց ցեղասպանության տարիներին փոխել են իրենց անունները, թաքցրել իրենց ինքնությունը` կամավոր կամ բռնի կերպով, իսկ դա նշանակում է, որ հարավարեւելյան Անատոլիայում «թաքնված գոյություն ունի հայկական տարրը, իսկ դա անհանգստացնում է թուրքական պետությանը»: