LiveJournal-ի վրա հարձակումները շարունակվում են

Խոշորագույն LiveJournal բլոգհոսթինգի վրա DDoS-հարձակումները շարունակվում են: Բլոգերներն անկարող են որեւէ գրառում կատարել իրենց օրագրերում: Հարձակումների մասին հայտարարվել էր մարտի 30-ին, սակայն հայտնի է դառնում, որ դրանք սկսվել էին մարտի 24-ից:

Սկզբում հայտարարվում էր, թե դրանք ուղղված են  ընդդիմադիր կեցվածք ունեցող մի քանի ռուս բլոգերների դեմ, սակայն երկրորդ հարձակման ժամանակ LiveJournal-ի ներկայացուցիչները հերքեցին այդ լուրը:

Ապրիլի 1-ից սկսած` կայքի ծանրաբեռնվածությունն այնքան է մեծացել, որ այցելուների 70 տոկոսը չի կարողացել օգտվել կայքի ծառայություններից:

Երկրորդ հարձակումը եղել է ապրիլի 4-ին եւ ուղղված է եղել այն բլոգների դեմ, որոնց ընթերցողները մեծաթիվ են:

Ինչպես գրում է Rian.ru-ն, SUP (որը ղեկավարում է LiveJournal-ը) տնօրեն Իլյա Դրոնովն ասել է, թե այդ հարձակումների նպատակը  LiveJournal բլոգհոսթինգի լսարանին շեղելն է եւ այլ սոցիալական ցանցեր ուղղորդելը:

LiveJournal Russia-ի ղեկավար Սվետլանա Իվաննիկովան հայտարարել է, որ չի բացառվում` դիմեն իրավապահ մարմիներին, սակայն դեռեւս ոչինչ պարզ չէ: