Ղազախստանում LiveJournal չկա

Ղազախստանում ինտերնետից օգտվողները չեն կարողանում մուտք գործել ամենահայտնի բլոգային համայնքը` LiveJournal-ը:

«Տվյալ կայք մուտք գործելն արգելված է Աստանայի Սարիարկինսկի դատարանի կողմից»,- Twitter-ի իր միկրոբլոգում գրել է Ղազախստանի կապի եւ տեղեկատվության նախարար Ասկար Ժումագալիեւը` պատասխանելով LiveJournal-ից օգտվողների բազմաթիվ հարցերին` այլ մանրամասներ չհաղորդելով:

«Ինտերֆաքսը» հաղորդում է, որ Ղազախստանում բլոգային այս կայքը փակել էին դեռեւս 2008-ի հոկտեմբերին: Դեռեւս այն ժամանակ ի պատասխան բողոքների` վարչապետը խոստացել էր խնդիրն ուսումնասիրել եւ լուծել հարցը, սակայն մինչ օրս որեւէ բան չի փոխվել:

LiveJournal-ի օգտատերերը կարծում են, որ կայքի փակման պատճառն այն է, որ 2008թ.-ին այս կայքում իր բլոգն է բացել վարկաբեկված քաղաքական գործիչ Ռահատ Ալիեւը: