Իշխանություններին մեղադրում է սպանության մեջ

ՀԱԿ-ի նախորդ հանրահավաքի ժամանակ ներկայացվել էր 15 պահանջ, դրանցից երեքն ընդգծվել էր: Այսօր լրագրողների հետ հանդիպման ժամանակ ՀԱԿ ներկայացուցիչ Դավիթ Շահնազարյանն ասաց, որ ընդգծված պահանջներից մեկը Մարտի 1-ի դեպքերի մեղավորներին բացահայտելն ու պատժելն է:

Ըստ նրա` քանի որ այդ պահանջը չի կատարվել, ապա դա կարելի է իշխանության կողմից ինքնախոստովանության քայլ համարել` հենց իշխանությունն է կազմակերպել այդ սպանությունները:

Դ. Շահնազարյանը նաեւ նշեց, որ մարտիմեկյան դեպքերի կրկնություն չի լինի երբեք, եւ որ ՀԱԿ-ն այս երեք տարիների ընթացքում իր քայլերը ճշգրտորեն հաշվարկել է ու իշխանություններին հնարավորություն չի տվել եւս մեկ անգամ նման գործողություն կատարել:

Ավելին. «Ես ավելի  քան համոզված եմ, որ Հայաստանում արտահերթ ընտրությունների միջոցով իշխանափոխությունն անցնելու է առանց որեւէ ցնցման, էլ չասած, որ մենք բացառում ենք իշխանության կողմից կատարված նման ողբերգության, ահաբեկչության կրկնությունը»:

Հարցին, թե ի՞նչ է ակնկալվում ապրիլի 8-ին կայանալիք ՀԱԿ-ի հանրահավաքից, եթե հաշվի առնենք այն, որ վերջին հանրահավաքից հետո ժողովրդի մի մասը հիասթափվել էր, Դավիթ Շահնազարյանը պատասխանեց, թե այս մեկը նախորդին չի զիջի իր բազմամարդությամբ. «Խոստանում ենք, որ չեք հիասթափվի»: