Կոչ են անում Օբամային` ճանաչել Ցեղասպանությունը

Եվրոպական 22 երկրներից մոտ 400 կազմակերպություն կոչ են անում ԱՄՆ նախագահ Բարաք Օբամային ճանաչել Հայոց ցեղասպանությունը: Նրանք իրենց ստորագրությունն են դրել մի նամակ տակ, որը պատրաստել է ՀՅԴ Եվրոպայի Հայ Դատի հանձնախումբը:

Նամակը Սպիտակ տուն է ուղարկվելու ապրիլի 3-ին` Օբամայի՝ Թուրքիա այցելության նախորդ օրը:

«Եվրոպայի հայերը, ինչպես նաեւ ժողովրդավար եվրոպացիները կշարունակեն խստորեն դիմադրել Թուրքիայի՝ ԵՄ անդամակցությանը, քանի դեռ Թուրքիան ժխտում է Հայոց ցեղասպանությունը, քաջալերում է ռասիզմը եւ գործի է դնում փոքրամասնություններին հալածող օրենքներ»,- ասվում է նամակում:

Նշվում է, որ Օբամայի` Ցեղասպանությունը ճանաչելու խոստման կատարումը  կնպաստի նաեւ Թուրքիայում ժողովրդավարացման զարգացմանը եւ կխթանի հայ-թուրքական հաշտեցման գործընթացը:

Նամակը եզրափակվում է  խոսքերով, որ «ԱՄՆ-ի կողմից  ցանկացած նահանջ կընկալվի որպես հանցակցություն Ցեղասպանություն իրականացրած Թուրքիային,որը շարունակում է իր արյունոտ գործողությունները»:

«Նախագահ Օբաման հնարավորություն ունի ցույց տալու,որ իտարբերություն իր նախորդների, քաջալերում է բարոյական պատասխանատվությունը, հարգանքը, արդարությունը եւ ճշմարտությունը:  Իսկ եթե ԱՄՆ-ը չճանաչի Հայոց ցեղասպանության փաստը, ապա մեծ հիասթափություն կպատճառի մարդկանց, եւ ակնհայտ կլինի, որ նա շարունակում է իր նախորդների վարած քաղաքականությունը»,- ասել է Հայ Դատի հանձնախմբի ատենապետուհի Հիլդա Չոբոյանը: