Թռչնաֆաբրիկային տուգանեցին 100 մլն դրամով

ՀՀ տնտեսական մրցակցության պաշտպանության պետական հանձնաժողովի (ՏՄՊՊՀ) մարտի 30-ի նիստում որոշվեց 100 մլն դրամ տուգանք կիրառել հավի ձվի շուկայում գերիշխող դիրք ունեցող Լուսակերտի տոհմային թռչնաբուծական ֆաբրիկայի նկատմամբ: Պատճառն այն է, որ ընկերությունը, իր արտադրանքը շուկա չհանելով, ստեղծել էր դեֆիցիտ, ինչը համարվում է գերիշխող դիրքի չարաշահում:

2010թ. դեկտեմբերին հանրապետության առեւտրի կետերում արձանագրված ձվի դեֆիցիտի, իրացման գների կտրուկ բարձրացման վերաբերյալ ՏՄՊՊՀ-ն ուսումնասիրություններ է կատարել եւ տեղեկատվություն պահանջել ձվի շուկայում գործող  6 խոշոր տնտեսվարող սուբյեկտներից:

Ուսումնասիրությունների համաձայն` այդ օրերին պահեստավորված է եղել մեծ քանակությամբ ձու, որի գերակշիռ մասը պատկանել է ԼՏԹՖ-ին:

Ընկերության ներկայացուցիչ Մանասե Եփրեմյանը ներկա պահին իր հարցերն ու անհամաձայնությունն է ուղղում հանձնաժողովի ներկայացուցիչներին: