Անվտանգության խորհրդի նիստ` Արցախում

Այսօր Արցախի նախագահ Բակո Սահակյանի գլխավորությամբ տեղի է ունեցել Անվտանգության խորհրդի նիստ, որի օրակարգում էին պարենային անվտանգության ապահովման հետ կապված խնդիրների ու իրականացվելիք միջոցառումների եւ 2011թ. փետրվարի 14-18-ը Արցախի  զինված ուժերի եւ ուժային կառույցների համատեղ հրամանատարաշտաբային զորավարժությունների անցկացման արդյունքների մասին հարցերը:

Ինչպես հայտնում են նախագահի աշխատակազմի տեղեկատվության գլխավոր վարչությունից, հաշվի առնելով պարենային անվտանգության ռազմավարական կարեւոր նշանակությունը երկրի համար՝ Բակո Սահակյանը նշել է, որ, չնայած այդ ուղղությամբ տարվում է բավականին աշխատանք, սակայն դեռեւս կան էական խնդիրներ, որոնք պահանջում են շուտափույթ եւ համալիր լուծում:

Նախագահը կառավարությանը հանձնարարել է մշակել պարենային անվտանգության ապահովման ուղղությամբ իրականացվելիք միջոցառումների ծրագիր եւ պարբերաբար զեկուցել դրա իրականացման ընթացքի մասին:

Օրակարգի երկրորդ հարցի վերաբերյալ զեկույցով հանդես են եկել պաշտպանության նախարար Մովսես Հակոբյանը եւ ուժային կառույցների ղեկավարները: Երկրի ղեկավարը կառավարությանը եւ զորավարժությունների անցկացման գործում ներգրավված համապատասխան մարմիններին հանձնարարել է անհրաժեշտ միջոցներ ձեռնարկել հայտնաբերված թերությունները վերացնելու ուղղությամբ եւ պարբերաբար զեկուցել իրականացվող աշխատանքների մասին: