Հայաստանը եւ Արցախը` զբոսաշրջային ցուցահանդեսում

Մարտի 19-20-ը, Լոս Անջելեսում ՀՀ գլխավոր հյուպատոսության նախաձեռնությամբ, Հայաստանը եւ Արցախը արդեն երկրորդ անգամ մասնակցել են ԱՄՆ արեւմտյան ափի խոշորագույն զբոսաշրջային միջոցառմանը` LA Times Travel & Adventure Show-ին:

Տարբեր երկրներից ժամանած հարյուրավոր կազմակերպությունների ներկայացուցիչները ներկայացրել են աշխարհի տարբեր անկյուններում գտնվող հանգստի ու ճամփորդության հանգստավայրեր: Երկու օրվա ընթացքում ցուցահանդեսն ունեցել է տասնյակ հազարավոր այցելուներ:

Հայաստանն ու Արցախը ներկայացել են միասնական տաղավարով: Հայկական տաղավարի այցելուների հարցերին պատասխանել են Հայաստանից ու Լեռնային Ղարաբաղից ժամանած, նաեւ տեղի հայկական զբոսաշրջային ընկերությունների ներկայացուցիչները: Այցելուներին բաժանվել են տեղեկատվական գրքույկներ:

LA Times թերթի հրատարակիչ եւ գործադիր տնօրեն Էդի Հարթենսթայնը նշել է, որ, ինչպես անցած տարի, այս անգամ եւս հայկական տաղավարն աչքի է ընկել գեղեցիկ նկարներով ու նյութերի բազմազանությամբ:

Ցուցահանդեսի մշակութային մասում ելույթ են ունեցել «Վարդան եւ Սիրանույշ Գեւորգյաններ» եւ «Զվարթնոց» պարային համույթների սաները. տեղեկացնում է ՀՀ ԱԳՆ մամուլի եւ տեղեկատվության վարչությունը: