Պուտինը դատապարտել է Արեւմուտքին

Ռուսաստանի վարչապետ Վլադիմիր Պուտինը դատապարտել է ՄԱԿ-ի Անվտանգության խորհրդի` Լիբիայի վերաբերյալ բանաձեւը` այն անվանելով «վնասաբեր», եւ հայտարարել է, թե փաստաթուղթը հիշեցնում է միջնադարյան խաչակրաց արշավանքները:

«Անվտանգության խորհրդի այդ բանաձեւը փաստացիորեն թույլ է տալիս ներխուժել ինքնավար պետություն»,- ասել է նա:

ՄԱԿ-ի Անվտանգության խորհրդի բանաձեւի ընդունումից անմիջապես հետո Մուամար Քադաֆին նույնպես միջազգային ռազմական գործողությունն անվանել է խաչակրաց արշավանք:

Պուտինի խոսքերով` ԱՄՆ-ի` տարբեր պետությունների հակամարտություններին խառնվելու քաղաքականությունը կայուն սովորույթ է դառնում եւ չունի ո'չ խիղճ, ո'չ տրամաբանություն:

Վարչապետը նշել է նաեւ, որ թեեւ Լիբիայի քաղաքական ռեժիմը չի համապատասխանում ժողովրդավարության արեւմտյան չափանիշներին, սակայն ոչ ոք իրավունք չունի խառնվելու երկրի ներքին գործերին:

ՄԱԿ-ի Անվտանգության խորհրդում Լիբիայի դեմ բանաձեւի ընդունման ժամանակ Ռուսաստանը չի օգտվել վետոյի իր իրավունքից, սակայն ավելի ուշ քննադատել է ուժ գործադրելու որոշումը. գրում է Газета.Ru-ն: