ՀԱԿ-ն ամենացանկալի ընդդիմությո՞ւնն է

«Մենք ամեն ինչ անելու ենք, որ գնանք արտահերթ նախագահական եւ խորհրդարանական ընտրությունների` ժողովրդավարական իշխանափոխության միջոցով, որովհետեւ արդեն իսկ տեսանելի է, որ հերթական ընտրությունները հերթական կեղծիք են արձանագրելու»,-այսօր հայտարարեց ՀԱԿ անդամ Լյուդմիլա Սարգսյանը:

Անդրադառնալով օրեր առաջ ՀԱԿ-ի հանրահավաքում հնչած կոչին` Լյուդմիլա Սարգսյանը վերահաստատեց այն. «Երկու ամիս ենք տալիս իշխանությանը, որպեսզի նա հասկանա` հեռանալու ժամանակն է»:

ՀՀԿ անդամ Լեռնիկ Ալեքսանյանն էլ նկատեց, որ ՀԱԿ-ի հանրահավաքում տեսել է բաներ, որ շատ վտանգավոր են ժողովրդի համար. «Եթե քաղաքական ուժը գիտի, որ ժողովրդին հավաքում է, բայց ժողովուրդն իրեն չի ենթարկվում, ու ինքը չի կարող կոորդինացնել ժողովրդի գործողությունները, այդ քաղաքական ուժը չպետք է ժողովուրդ հավաքի, դա վտանգավոր է ե'ւ երկրի, ե'ւ իրենց` ընդդիմության համար»:

«Դա ոչ թե երկրի, այլ իշխանության համար է վտանգավոր»,- հակադարձեց Լյուդմիլա Սարգսյանը: Ի դեպ, նա ՀԱԿ-ին համարեց ամենացանկալի քաղաքական ուժը`նշելով, որ այսօր քաղաքական դաշտում միակ արտահայտված ընդդիմությունը ՀԱԿ-ն է: «Եթե Դաշնակցության եւ իրենց ընդդիմություն հայտարարող այլ քաղաքական ուժերի նպատակները համընկնեն ՀԱԿ-ի որդեգրած նպատակներին, չի բացառվում, որ նրանք ցանկություն հայտնեն կա'մ միավորվելու, կա'մ ակտիվ համագործակցելու ՀԱԿ-ի հետ, որովհետեւ համակարգի դեմ առանձին-առանձին պայքարելն անհնար է»,- հայտարարեց տիկին Սարգսյանը: