ՀԵՏՔ. Ինչու աննկատ մնացին չինական «ներդրումները»

Հունվարի12-ին Հոնկոնգում գործող չինական Fortune Oil ընկերությունը ձեռք է բերել Bounty Recources Armenia-ի 35 տոկոս մասնաբաժինը:

Լոնդոնի բորսայի www.londonstockexchange.com կայքի տեղեկացմամբ` գործարքի արժեքը կազմել է 24 միլիոն դոլար:

Այս գործարքին Հայաստանի կառավարությունը չարձագանքեց: Եթե հաշվի առնենք, որ նման դեպքերում մեր կառավարության արձագանքը շատ բուռն է լինում, ապա առնվազն տարօրինակ է, որ ոչ միայն չեն արձագանքում, այլ նաեւ գործարքից անտեղյակ են ձեւանում:

Պատճառը, հավանաբար, այն է, որ այս գործարքում նշված գումարը որեւէ կերպ Հայաստանի հետ կապ չունի: Այն պատկանում է ԱԺ երկու պատգամավորների` Վարդան Այվազյանին եւ Տիգրան Արզաքանցյանին:

Տիգրան Արզաքանցյանին գտնելու համար գուցե շուտով հարկ լինի դիմել Ինտերպոլին: Այս պատգամավորն ընդհանրապես չի մասնակցում ԱԺ աշխատանքներին, երբեմն հրապարակումներ են լինում նրան այս կամ այն քաղաքում ծեծելու մասին, իսկ ԱԺ-ում նրա օգնականն ասում է, թե բուժման է մեկնել, ո՞ւր` անհայտ է:

Բայց հաշվի առնելով չինական այս գործարքի «ոլորապտույտները»` կարելի է ենթադրել, որ Տ. Արզաքանցյանը զբաղված էր հենց այս գործարքով` զանազան ընկերություններ գրանցելով եւ ամեն ինչ խճճելով: