Հայաստանը երբեք չի ենթարկվի Թուրքիայի ճնշումներին

Առաջին անգամ ՀՀ ղեկավարի պաշտոնական ելույթում հնչեցին Հայաստանի եւ առհասարակ տարածաշրջանի նկատմամբ Թուրքիայի քաղաքականությանը վերաբերող լուրջ ու հիմնական գնահատականներ:

Այսօր հրավիրված մամլո ասուլիսի ժամանակ այս մասին ասել է թուրքագետ Ռուբեն Սաֆրաստյանը` անդրադառնալով  ՀՀ նախագահի կիպրոսյան այցին:

Թուրքագետը կարեւորում է ՀՀ նախագահի ելույթի այն կետերը, որոնցում ընդգծված էր` Թուրքիան ՀՀ նկատմամբ շանտաժի քաղաքականություն է վարում: Ըստ Սաֆրաստյանի` առաջին անգամ պաշտոնական մակարդակով հայտարարվեց, որ Հայաստանը եւ’ բարոյական,  եւ’ իրավական բոլոր իրավունքներն ունի Թուրքիայի հետ հարաբերություններում նախապայման առաջադրելու համար: Մյուս կարեւոր ձեւակերպումները, ըստ թուրքագետի, վերաբերում էին Թուրքիայի տարածաշրջանային քաղաքականությանը:

«Նախագահի ելույթում շատ հստակ գնահատական տրվեց Թուրքիայի նեոօսմանիզմի գաղափարախոսությանը»,- ասաց Սաֆրաստյանը: Ըստ նրա` Թուրքիան Օսմանյան կայսրության փլուզումից ի վեր փորձում է նախկինում այս կայսրության կազմում գտնվող երկրների նկատմամբ գերիշխող դիրք զբաղեցնել: «Հայաստանը երբեք չի ենթարկվի»,-ասում է Սաֆրաստյանը: Նա հուսով է, որ ՀՀ իշխանությունների դիրքորոշումը չի փոխվի եւ դիվանագիտական այս նոր գիծը կշարունակվի: