Ռուսաստանը երբեք չի ենթարկվի ԱՄՆ-ի ճնշմանը․ Պուտին

Վլադիմիր Պուտինը հայտարարել է, որ Ռուսաստանը երբեք չի ենթարկվի ԱՄՆ-ի ճնշմանը, սակայն ընդունել է, որ նոր պատժամիջոցները կարող են որոշ տնտեսական վնաս հասցնել։ Նրա խոսքերը հնչել են այն ժամանակ, երբ հաղորդվում է, որ Չինաստանը և Հնդկաստանը՝ Մոսկվայի հիմնական նավթային գնորդները, սկսել են կրճատել ռուսական նավթի ներմուծումները՝ Վաշինգտոնի կողմից Ռուսաստանի երկու խոշոր արտադրողների՝ «Ռոսնեֆտի» և «Լուկոյլի» նկատմամբ պատժամիջոցներ սահմանելուց հետո։

ԱՄՆ-ի այս քայլը, որը նախագահ Թրամփը ներկայացրել է որպես Ուկրաինայի պատերազմի շուրջ Մոսկվայի վրա ճնշում գործադրելու միջոց, արգելում է Ռուսաստանի խոշոր նավթային ընկերություններին մուտք ունենալ միջազգային ֆինանսական համակարգ։

Պուտինը նոր սահմանափակումները որակել է որպես «թշնամական քայլ» և «անօգուտ ճնշման փորձ», սակայն նաև ընդունել է, որ «որոշ կորուստներ սպասվում են»։ Նա նախազգուշացրել է, որ այս քայլերը կհանգեցնեն նավթի համաշխարհային գների բարձրացմանը և հորդորել Թրամփին «մտածել, թե ում համար է իրականում աշխատում իր վարչակազմը»։

Չինաստանը դատապարտել է ԵՄ-ի քայլը՝ հայտարարելով, որ «Չինաստանը Ուկրաինայի ճգնաժամի կողմ չէ»։

Փորձագետները նշում են, որ պատժամիջոցները կբարդացնեն Ռուսաստանի նավթի առևտուրը՝ ստիպելով ընկերություններին օգտագործել միջնորդների և ավելի ծախսատար «ստվերային նավատորմ» ուղիներ։ Չնայած Մոսկվան, ամենայն հավանականությամբ, կադապտացվի նոր իրավիճակին, ԱՄՆ-ի պատժամիջոցների լայն ընդգրկումը, ըստ մասնագետների, կարող է խոչընդոտել շատ միջազգային գործընկերների՝ Ռուսաստանի հետ համագործակցությունը շարունակելու ցանկությանը։