Մենք տեր կկանգնենք ձեր դիմումներին. Արմեն Ռուստամյանը կոչ արեց չտրվել ճնշումներին

ԱԺ հայտարարությունների ժամին ՀՅԴ խմբակցության ղեկավար Արմեն Ռուստամյանը նշեց, որ այսօր ոչ իշխանական չորս ուժերը համաձայնագիր են ստորագրել, որում ներկայացված են կառավարությանն առաջադրվող 12 պահանջները: Նա կոչ արեց բոլորին` լուրջ վերաբերվել այդ փաստին: Նաեւ նշեց, որ Դաշնակցությունն այդ համաձայնագրի տեքստն ուղարկել է նաև ՀՀ նախագահին ու ՀՀ վարչապետին:

Ռուստամյանի խոսքով` իրական քաղաքակիրթ հարաբերությունների սկիզբ է դրվում, և քառյակի պահանջները լավագույն շանսն են, որ կառավարությունը վերականգնի հասարակության` իր հանդեպ վստահությունը:

«Պատրաստ ենք լիարժեք քննարկել այս պահանջները, եթե կա խնդիր բանավիճելու, պատրաստ ենք բանավիճել: Ընդդիմությունը և իշխանությունը մեկ նավի մեջ են, մենք չենք ուզում ճոճել այդ նավը, որովհետև երկրի գահավիժումից տուժելու են բոլորը»,- ասաց Արմեն Ռուստամյանը:

Պատգամավորը կարևորեց, որ կառավարության խոսքը պետք է վերածվի գործի, և եթե ասվում է, որ մարդիկ կարող են դիմումներ գրել` հրաժարվելով պարտադիր վճարներից, ապա չպետք է մյուս կողմից ճնշումներ իրականացնել այդ մարդկանց վրա, որպեսզի չգրեն այդ դիմումները:

«Մի արեք դա, ես կոչ եմ անում մեր ժողովրդին, ովքեր ճնշումների տակ են, դիմեք մեզ, դիմեք «Դեմ եմ» շարժմանը, մենք տեր կկանգնենք բոլորի դիմումներին, և ականջալուր լինելը կսկսվի հենց այդտեղից»,- ասաց Արմեն Ռուստամյանը: