Գարնանը պանիր չի լինի

Գարնանը պանիր չի լինի՝ Ագրարային համալասրանի մասնագետներն օրեր առաջ պնդեցին:

«Քիչ են պանրի պաշարները և գարնան վերջին հավանաբար խնդիր կլինի, կարծում եմ, դա գների վրա չի ազդի»,- «ԵՐԿԻՐ»-ին ասաց «Աշտարակ կաթ» ընկերության մարքետինգի բաժնի բրենդմենեջեր Արամ Մինասյանը: Մինասյանը նաև տեղեկացրեց, որ այժմ իրենք կաթը գնում են լիտրը 150-160 դրամով:

Գյուղտնտեսության նախարարությունն այս ընկերության կողմից արած հայտարարությունը մեկնաբանում է այսպես. եթե այսօր 1 կգ պանիրը գնում ենք 2.500 դրամով, որը նվազագույնը երեք ամիս առաջ մթերված կաթից է, և որի գինը 60-80 դրամ էր, ուրեմն՝ արդեն 160-180 դրամով գնված կաթի պանիրը երեք ամիս հետո լուրջ գնային խնդիրներ է առաջ բերելու:

Այսօրվա պանրի աննախադեպ գները բերում են նրան, որ մարդիկ քիչ են պանիր գնում, հետևաբար, պանրի պաշարները կարող են և մի կերպ ձգել մինչև գարուն, եթե, իհարկե, մինչև տարեվերջ գնային անկում չլինի: