Կանայք բողոքում են հղիության նպաստը նվազեցնելու դեմ

Մի խումբ կանայք հավաքվել են ՀՀ նախագահի նստավայրի դիմաց եւ պահանջում են, որ Սերժ Սարգսյանը չվավերացնի «Ժամանակավոր անաշխատունակության նպաստների մասին» օրենքի նախագիծը:

Ըստ օրենքի նախագծի` հղիության նպաստները նվազեցվելու են:

Նախաձեռնող խմբի անդամները համարում են, որ օրենքը վտանգավոր ռազմավարություն է ՀՀ-ի համար, քանի որ այն սպառնում է մեր երկրի բնակչության թվաքանակի աճին, նպաստավոր պայմաններ է ստեղծում երկրից երիտասարդ մասնագիտական ներուժի արտագաղթի համար, ինչպես նաև նպաստում է աշխատավարձերի ստվերայնացման ավելացմանը:

Թեեւ արդեն իսկ որոշ լրատվամիջոցներով հաղորդագրություն է տարածվել, որ նախագահը ստորագրել է փաստաթուղթը, սակայն կանայք չեն վստահում այս ինֆորմացիային, քանի որ ասվել է նաեւ, որ նախագահը երկրում չէ, մեկնել է Թուրքմենստան:

Կանայք նշում են, որ եթե նույնիսկ նախագահը վավերացնի նախագիծը (կամ եթե ճշտվի, որ արդեն իսկ վավերացրել է), ապա իրենք դիմելու են միջազգային ատյանների` իրենց իրավունքները պաշտպանելու համար:

Նշենք, որ մի քանի օր առաջ նրանք ներկայացրել էին այն հիմնավոր պատճառները, որոնցից ելնելով չպետք է նախագիծը վավերացվի: