Գիշերային թռիչքները նվազեցնելու ուղղությամբ բանակցություններ են տարվում. Ճշմարիտյան

Այսօր լրագրողները էկոնոմիկայի նախարար Կարեն Ճշմարիտյանից հետաքրքրվեցին, թե ինչ կարծիք ունի վարչապետի այսօրվա հանձնարարականի վերաբերյալ` կես տարով դադարեցնել տեսչական ստուգումները: Նախարարը պատասխանեց, որ այդ որոշումն ուղղված է գործարար միջավայրի բարելավմանը:

«Առաջին հերթին կարծում եմ, որ դա գործարար միջավայրի բարելավմանն է ուղղված և որոշակի մեղմացումներին: Երկրորդ` տեսչական բարեփոխումները հիմա ընթացքի մեջ են, և, ըստ էության, տեսչական մարմինների կրճատումը ենթադրում է տվյալ մարմինների որոշակի գործունեության փոփոխություն` կառուցվածքային փոփոխություն»,- ասաց նա:

Ինչ վերաբերում է վարչապետի մեկ այլ հանձնարարականին` ավիափոխադրումների ոլորտի կարգավորմանը, որպեսզի գիշերային ժամերի թռիչքները նվազեցվեն, նախարարը նշեց, որ բանակցություններն այս պահին ընթացքի մեջ են: Դիտարկմանը, թե վտանգ չկա՞, որ համաձայնության չգալու դեպքում ավիափոխադրողները կհեռանան Հայաստանից, Ճշմարիտյանն արձագանքեց, թե այս պահին նման մտավախություն չկա, և չի կարծում, որ հեռանալու խնդիր կլինի:

«Ամեն դեպքում` պետք է վերաբերմունք ցույց տալ, որովհետև երկուստեք անհարմար է՝ և՛ ներգնա զբոսաշրջիկի համար, և՛ մեր քաղաքացու համար, ով ժամանում է Եվրոպա, օրինակ, առավոտյան ժամը 06:00-ին և 9 ժամ պետք է սպասի կամ պետք է նախօրոք հյուրանոցում համար վերցնի և մեկ օրվա ավելի վճար կատարի»,- ասաց նախարարը: