Իրանը Ֆրանսիայի դեսպանին կանչել է ԱԳՆ՝ դպրոցականների բողոքները ցրելու պատճառով

Իրանը Թեհրանում Ֆրանսիայի դեսպան Պիեռ Կոշարին կանչել է ԱԳՆ՝ դպրոցականների բողոքի ակցիաների մասնակիցների դեմ ֆրանսիական իշխանությունների գործողությունների առնչությամբ։

Ինչպես հայտնում է Mehr-ը, Թեհրանը Փարիզից պահանջել է ապահովել խաղաղ հավաքների իրավունքը և հետաքննել ոստիկանության կողմից ուժի չափազանց կիրառման մասին հաղորդումները։

Կոշարը երեքշաբթի կանչվել է Իրանի արտաքին գործերի նախարարություն, որտեղ մարդու իրավունքների վարչության գլխավոր տնօրենի պաշտոնակատար Համիդ Ահմադին ներկայացրել է Թեհրանի մտահոգությունը բողոքի ակցիաների մասնակիցների նկատմամբ վերաբերմունքի կապակցությամբ։

Հիշեցնենք՝ Ֆրանսիայում դպրոցականների բողոքի ցույցերի պատճառով կաթվածահար է եղել 180 դպրոցների աշխատանքը, կան բազմաթիվ ձերբակալվածներ։

Փարիզում ցուցարարները քանդում են գրասենյակները և խանութների ցուցափեղկերը, ոստիկանությունն արցունքաբեր գազ և խլացնող նռնակներ է կիրառում. Ֆրանսիայում շարունակվում են աշակերտների բողոքի ակցիաները։

Ֆրանսիայի մայրաքաղաքի աշակերտներն ու ուսանողները դուրս են եկել փողոց՝ պահանջելով ավելացնել կրթության ոլորտի ֆինանսավորումը և բարելավել ուսումնական պայմանները։