Ալիկ Ալեքսանյանը քաղբանտարկյալ է՝ այս բառի դասագրքային իմաստով․ Ռուբեն Մխիթարյան

«Ուժեղ Հայաստան» դաշինքի անդամ Ռուբեն Մխիթարյանը գրել է.

«Ալիկ Ալեքսանյանի կալանքը երկարաձգվեց ևս երկու ամսով։

Կալանքը պատիժ չէ։ Այն բացառիկ խափանման միջոց է, որը կարող է կիրառվել միայն այն դեպքում, երբ առկա են կոնկրետ, իրական և հիմնավորված ռիսկեր՝ անձի թաքնվելու, վարույթին խոչընդոտելու կամ այլ կերպ արդարադատությունից խուսափելու վերաբերյալ։

Եվ ամեն անգամ կալանքը երկարաձգելիս պետությունը պարտավոր է ոչ թե կրկնել նույն ձևակերպումները, այլ հիմնավորել՝ ինչո՞ւ է մարդու ազատությունից զրկելը շարունակում մնալ անհրաժեշտ և համաչափ։

Երբ ամիսներ շարունակ ազատությունից զրկելը վերածվում է ինքնանպատակ գործընթացի, իսկ կալանքի երկարաձգումը՝ գրեթե մեխանիկական որոշման, մենք այլևս գործ ունենք ոչ թե արդարադատության, այլ կալանքը որպես պատժի գործիք օգտագործելու հետ։

Ալիկ Ալեքսանյանը քաղբանտարկյալ է՝ այս բառի դասագրքային իմաստով։

Նրան կարելի է պահել ճաղերի հետևում ևս երկու ամիս, կարելի է երկարաձգել կալանքը նորից ու նորից, բայց դրանից ապօրինությունը օրինական չի դառնում, իսկ քաղաքական հետապնդումը՝ արդարադատություն։

Իրավական պետությունում դատարանը մարդու ազատության երաշխավորն է, ոչ թե մեղադրանքի կամքի հաստատողը»։