«Սև հովազի» կալանավորված հրամանատար Սերոբ Գասպարյանի առողջական վիճակը լավ չէ

«Սև հովազ» ռազմահայրենասիրական ՀԿ-ի նախագահ Սերոբ Գասպարյանն ունի կյանքին վտանգ սպառնացող հիվանդություններ, որոնք համատեղելի չեն կալանքի հետ։ Այս մասին հայտարարություն է տարածել Գասպարյանի պաշտպանական թիմը՝ ընդգծելով, որ Գասպարյանը շուրջ 1 տարի առաջ ՔԿՀ է ընդունվել լիովին առողջ։

Թիմը բժշկական փորձաքննության անաչառության խնդրի մասին է բարձրաձայնում՝ նշելով, որ փորձաքննություն իրականացնող մարմնի ղեկավարը գործով դատախազի հայրն է։ Սա առաջացնում է ակնհայտ շահերի բախում և խաթարում փորձաքննության օբյեկտիվության երաշխիքները, ինչով պայմանավորված` պաշտպանական թիմը նման միջնորդություն ներկայացնել չի կարող։

Դատական նիստերը լավագույն դեպքում կայանում են ամսական մեկ անգամ, հաճախ չեն էլ կայանում։

«Այս ամենի արդյունքում պետությանը ծառայած հրամանատարին թողնում են դանդաղ մահվան դեմ միայնակ պայքարի մեջ, ինչը իրավական պետությունում անթույլատրելի է»,- նշված է պաշտպանական թիմի հայտարարության մեջ։

Հավելում են՝ կիրառված խափանման միջոցը պետք է լինի համաչափ և նվազ միջամտող. առկա առողջական ծանր ռիսկերը պահանջում են այլընտրանքային միջոց։

Պաշտպանական թիմը պահանջում է կազմակերպել անկախ, բազմապրոֆիլ բժշկական զննում քաղաքացիական մասնագիտացված կենտրոնում՝ լիարժեք ախտորոշմամբ և բուժական հստակ պլանով։ Պահանջում է նաև.

«Ապահովել անաչառություն, ձեռնարկել փորձաքննության մարմնի ղեկավարի չեզոքացման կամ դատախազի փոխարինման քայլեր։

Վերանայել կալանավորումը և կիրառել ազատությունից չզրկող ու համաչափ խափանման միջոց՝ հաշվի առնելով առողջական վիճակն ու վաստակը։

Ապահովել նիստերի կանոնավոր անցկացում՝ կազմակերպելով ուղեկցումն առանց ուշացումների և բացառելով «լոգիստիկ» պատրվակներով ձգձգումները։

Սահմանել և հրապարակել սեղմ դատավարական օրացույց, ապահովել դատական վերահսկողության իրական արդյունավետություն»։

Պաշտպանները դիմում են նաև Հայաստանի մարդու իրավունքների պաշտպանին (ՄԻՊ), ՀՀ-ում ԱՄՆ դեսպանատուն, Հայաստանում Եվրոպական միության պատվիրակությանը, ինչպես նաև մարդու իրավունքների միջազգային գործընկերներին՝ կոչ անելով իրենց իրավասության շրջանակներում համապատասխան քայլեր ձեռնարկել։