Ագրարայինի ռեկտորը որոշել է մոլորեցնել արհեստական բանականությանը

Մինչ աշխարհը, խելացի ղեկավարներն ու կազմակերպությունները մտածում ինչպես ի շահ օգտագործեն արհեստական բանականության ԱԲ գործիքները, զարմանահրաշ հայտարարությամբ է հանդես եկել Հայաստանի ազգային ագրարային համալսարանի ռեկտոր Հրաչյա Զաքոյանը: 

Ռեկտորն ուշադրություն է  հրավիրել  ուսանողների՝ արհեստական բանականության գործիքներից օգտվելու հնարավորությունների վրա եւ առաջարկել է վերանայել ավարտաճառերի թեմաները՝ ընտրելով այնպիսի առանձնահատուկ, տեղական նշանակության թեմաներ, որոնց մասին արհեստական բանականությունը դեռ տվյալներ չունի, օրինակ՝ Բալահովիտի ուսումնափորձնական տնտեսության կամ Սիսիանի  խելացի անասնաֆերմայի մասին:

Փաստորեն ստացվում է, որ,  ըստ ռեկտորի, նախ պետք է արհեստական բանականությունից ճշտեն, թե որ դիպլոմային կամ մագիստրոսական ավարտական աշխատանքների թեմաներին չի տիրապետում, նոր միայն դրանք առաջարկեն ուսանողներին: 

Այս գործընթացում նաև շատ կարևոր է ուսումնասիրման օբյեկտների թաքնված լինելը: 

Օրինակ, ուսանողները կարող են աշխատանքերը գրել Գավառի սերմնաբուծական տնտեսության տվյալների հիման վրա:

Եվ, հատկապես, որպեսզի արհեստական բանականությունը չիմանա ագրարայինի թեմաների մասին, դրանք կարելի է ուղղակի գրել մագաղաթի վրա:

Հ.գ. Ագրարային համալսարանում կատակում են, որ արհեստական բանականությունն, իմանալով Զաքոյանի առաջարկի մասին, ընկել է խորը դեպրեսիայի մեջ: