Կոչ Ադրբեջանից՝ Ատրպատականի բնակչությանը՝ պատրաստ լինել հռչակելու Հարավային Ադրբեջանի թյուրքական հանրապետությունը՝ 400 հազար քառակուսի կմ տարածքով

Նոր տեսաուղերձով է հանդես եկել Հարավային Ադրբեջանի ազգային զարթոնք շարժման (Güney Azərbaycan Milli Oyanış Hərəkatı / GAMOH) առաջնորդ Մահմուդալի Չեհրեգանին։

Սա վտարանդիության մեջ գտնվող և, որպես պանթյուրքիզմի գաղափարախոս, բավականին հայտնի Չեհրեգանիի երկրորդ տեսաուղերձն է, իսկ առաջինը հրապարակվել էր հունիսի 14-ին, կարող եք կարդալ՝ այստեղ։

Ստորև ներկայացվում են մի քանի թեզեր, որոնք հնչեցրեց Չեհրեգանին իր երկրորդ տեսաուղերձում՝

• Ատրպատականի «40 միլիոն թյուրքերը» պետք է ուշիուշով և շատ զգոն հետևեն տեղի ունեցող զարգացումներին և պատրաստ լինեն՝ ծավալելու շարժում։
• Պետք է զինվեն հնարավոր բոլոր միջոցներով, և եթե պետք է գրավել զինանոցներ, ապա պիտի պատրաստ լինեն նաև դրան՝ թույլ չտալու համար, որ կոտորեն իրենց կանանց ու երեխաներին, մայրերին ու հայրերին։
• Տեղի ունեցող զարգացումները ցույց են տալիս, որ Ատրպատականի «թյուրքերը» լրջագույն խնդիրներ են ունենալու քրդերի հետ, որոնք «աչք են տնկել թյուրքական հողերի վրա, ընդհուպ մինչև Թավրիզ»։
• Եթե Իրանում գործող կարգերի փլուզումը հանգեցնի Փահլավիների շահական դինաստիայի վերադարձին, դա կնշանակի «Ատրպատականի թյուրքերի վերջը»։
• Նաև Փահլավիների հնարավոր վերադարձի պատճառով է, որ Ատրպատականի թրքությունը պետք է ուշադիր հետևի իրադարձություններին և անհրաժեշտ պահին կարողանա հռչակել սեփական պետությունը։
• Ատրպատականում պիտի հռչակվի մի պետություն, որը կոչվելու է Հարավային Ադրբեջանի թյուրքական հանրապետություն (ՀԱԹՀ)։
• ՀԱԹՀ-ն ընդգրկելու է 400.000 քառակուսի կիլոմետր տարածք, և դրա մայրաքաղաքը լինելու է Թավրիզը։
• ՀԱԹՀ-ն լինելու է խորհրդարանական հանրապետություն և կառավարվելու է ամբողջությամբ ժողովրդավարական մոտեցումներով:

Աղբյուրը՝ caspian_frontie