Ի՞նչ հրաշքով է Ագրարային համալսարան ընդունված 243 ուսանողը վերաճել 2,533-ի

Yerkir.am-ը ուսումնասիրել է Հայաստանի ազգային ագրարային համալսարանի կայքը և պարզել է մի հետաքրքիր տեղեկատվություն, ըստ որի` համալսարանի առկա ուսուցման համակարգում ուսանողների թիվը 2025 թվականի հունվարի 3-ի դրությամբ կազմում է շուրջ 2533: 

Ըստ համալսարանի պաշտոնական տեղեկատվության` միասնական քննությունների արդյունքում առկա ուսուցման համակարգ 2021 թ. ընդունվել է 90, 2022 թ.՝ 41, 2023 թ.՝ 60 դիմորդ: Անցած տարի ընդունվել է 52 դիմորդ: Ստացվում է, որ 2021-2024 թթ. ագրարային համալսարան ընդունվել է ընդամենը 243 դիմորդ:  

Եվ թե ինչպես 243 ուսանողը 2025 թվականի հունվարի 3-ին դարձավ 2533, թերևս կիմանան միայն ԿԳՄՍ նախարար Ժաննա Անդրեասյանն ու ռեկտոր Հրաչյա Զաքոյանը: 

Yerkir.am-ը հարցում է ուղարկել համալսարանի հոգաբարձուների խորհրդի նախագահ, էկոնոմիկայի փոխնախարար Արման Խոջոյանին և ԿԳՄՍ փոխնախարար, խորհրդի անդամ Արաքսյա Սվաջյանին 2533 առկա ուսանողների մասին տեղեկատվությունը ճշտելու նպատակով: