Իրանում իմփիչմենթի գործընթաց են սկսել ճանապարհների և քաղաքաշինության նախարարի դեմ

Իրանի խորհրդարանն իմփիչմենթի գործընթաց է սկսել Իսլամական Հանրապետության ճանապարհների և քաղաքաշինության նախարար Ֆարզանե Սադեղի դեմ՝ երկրի հարավում գտնվող Շահիդ Ռաջայի անվան նավահանգստում անփութության հետևանքով առաջացած պայթյունի պատճառով։

Ինչպես «Արմենպրես»-ը տեղեկանում է իրանական EcoIran լրատվականից՝ այս մասին հայտարարել է Իրանի խորհրդարանի քաղաքացիական շինարարության հանձնաժողովի անդամ Մանան Ռայիսին։

Նա նշել է, որ ճանապարհների և քաղաքաշինության նախարարի պաշտոնանկության գործընթացը նախաձեռնվել է խորհրդարանի անդամների կողմից՝ հիմնվելով թույլ տված թերացումների վրա։ 

«Ֆարզանե Սադեղի իմփիչմենթի առաջարկը մինչ օրս ստացել է խորհրդարանի 41 անդամի ստորագրությունը», - հայտնել է նա։ 

Փաստաթղթում ուրվագծել է ութ առանցքային հարց, որոնց թվում նշվել է նավահանգստի գործունեության կազմակերպման անփութությունը և անգործությունը, նախարարության վատ գործելակերպը բնակարանային շուկան կարգավորող օրենքների կիրառման գործում, տրանսպորտի ոլորտում ստեղծված բարդ իրավիճակը, բնակարանային գրանցման ծրագրի փակումն ու մարդկանց իրենց օրինական իրավունքներից զրկելը և այլն։

Մանան Ռայիսին նաև նշել է, որ նախարարը վստահության քվեի նիստում ներկայացրել էր իր նախարարության տարբեր առաքելությունների կոնկրետ պարտավորությունները, սակայն ծառայությունից ամիսներ անց և չնայած բազմաթիվ հետևողական քայլերին, հանդիպումներին, բանավոր, գրավոր և անձնական հիշեցումներին, գործնականում չկա որևէ առաջընթաց կամ ճանապարհների և քաղաքային զարգացման տարբեր ոլորտներում լուրջ վերափոխումների ծրագրեր։

Իրանի Բենդեր Աբաս քաղաքի հարավում գտնվող Շահիդ Ռաջայի անվան նավահանգստում ապրիլի 26-ին տեղի ունեցած պայթյունի և դրան հաջորդած հրդեհի զոհերի թիվը հասել է 70-ի։ Պայթյունի հետևանքով վիրավորված 1072 մարդ դուրս է գրվել հիվանդանոցից, 138-ը դեռևս բուժում են ստանում։

Ավելի վաղ Իրանի ներքին գործերի նախարար Էսկանդար Մոմենին հայտարարել էր, որ տեղի ունեցած պայթյունն անփութության ու թերությունների հետևանք է։