ՔՊ-ի մերժումը շարունակվում ու խորանում է, այդպես էլ լինելու է․ Կյուրեղյան

ՔՊ-ի մերժումը շարունակվում ու խորանում է, այդպես էլ լինելու է: Այս մասին ԱԺ-ում ասաց ՀՀ ԱԺ «Հայաստան» խմբակցության պատգամավոր Արմենուհի Կյուրեղյանը: Պատգամավորի ելույթն ամբողջությամբ ներկայացնում ենք ստորև.

«Ինչպես գիտեք, ժողովրդավարության բաստիոնում 2021թ-ից առ այսօր վանաձորցիները չեն կարողացել իրացնել սահմանադրությամբ իրենց տրված իրավունքը՝ ունենալ իրենց նախընտրած կուսակցության ներկայացուցիչին որպես համայնքի ղեկավար, որովհետև Էդմոն Մարուքյան, Լուսավոր Հայաստանի ուղղակի աջակցությամբ կասեցվել է համայնքի ղեկավարի ընտրության օրակարգով  ավագանու նիստը, ՔՊ-ն ԱԺ իր մեծամասնությամբ վարչապետին տվել է սահմանադրությամբ չնախատեսված լիազորություն և նա էլ համայնքի ղեկավարի ԺՊ էնշանակել մեկին, ով համայնքի բնակիչների կողմից շատ քիչ ձայն էր ստացել և այդպես էարդեն մի քանի տարի:

Իսկ համայնքի ղեկավարի ընտրության օրակարգով ավագանու նիստի կայացման արգելանքի հանման  հարցով դատական նիստը, որը նշանակված էր ապրիլի 9-ին, նորից հետաձգվեց՝ դատավորի զբաղվածության պատճառով:

Դե բա ժողովրդավարությունը հենց այդպես էլ լինում է, համայնքի բնակիչը չի կարող ունենալ իր ընտրած համայնքի ղեկավարին, եթե դատավորը զբաղված է:

Իսկ միգուցե հետաձգվեց, որովհետև…

Մարտի 30-ին Գյումրիում և Փարաքարում կայացան ՏԻՄ արտահերթ ընտրությունները: Ինչու՞ արտահերթ, որովհետև օրվա իշխանությունը,անտեսելով քաղաքացիների նախորդ ընտրությունների արդյունքները, ժպ-երի դեմքով զավթել էրՏԻՄ-ը, ինչպես Վանաձորում:

Թե՛ Փարաքարում, և թե՛ Գյումրիում մեր հայրենակիցները կատարեցին իրենց ընտրությունը և  նորից մերժեցին ՔՊ-ին:

Այդ համայնքներում ՔՊ պարտությունը  բոլորովին այլ մակարդակ ունեցավ: Եվ հենց սա վախեցրեց ՔՊ-ին:

ՔՊ-ին չփրկեց ո՛չ վարչական ռեսուրսի անսահման օգտագործումը, ո՛չ ընդդիմադիր թեկնածուների դեմ բռնաճնշումների կիրառումը, ո՛չ վախի մթնոլորտում ընտրողներին ուղղորդումը, ո՛չ էլ բարձրաստիճան ՔՊ պաշտոնյաներին այդ համայնքեր գործուղելը:

Գյումրեցիների ու Փարաքարի բնակիչների մերժումը  ՔՊ-ին ապացուցեց հետևյալը.

• Հանրությունը երբեք ասֆալտը չի՛գերադասի հայրենիքից:
   
• Հանրությունը մերժու՛մ է որպես ժողովրդի կամք ներկայացվող՝Եվրոպական Միությանը միանալու գործընթացի անհրաժեշտությունը: Եվրաքվեի հավաքած ձայները վկա:
   
• Նիկոլիզմի կողմից անընդհատ օգտագործվող՝ նախկինների վերադարձով վախեցնելու թեզն այլևս չի՛ աշխատում:
   
• ՔՊ-ին աջակցող ոչ մի այլ ուժ չարժանացա՛վ ընտրողների գոնե 1 մանդատի:
   
• Հանրությունը  ընտրու՛մ է   ինքնիշխան Հայաստան երկիրը, և  ոչ թե թուրքին հպատակությունը:
   
• Հանրությունը մերժու՛մ էթուրքադրբեջանական տանդեմին ամեն օր մի նոր զիջում անող, օրեցօր աճող նրանց ախորժակը բավարարող նիկոլիզմը:
   
• Ընդդիմության մեջ սեպ խրելու ցանկացած փորձ տապալվում է, եթե հարցը վերաբերվում է օրվա իշխանություններին հեռացնելուն:
   
• Ընդգծվե՛ց ընտրության մասնակցության տոկոսի բարձրացման արդյունավետությունը:
   
• Խիստ կարևորվ՛եց ընտրական տեղամասերում աշխատող, խորհրդարանական ընդդիմությունը ներկայացնող հանձնաժողովների անդամների, ԶԼՄ ներկայացուցիչների ու դիտորդների անձնվեր աշխատանքը:

Շնորհավորում եմ Փարաքարում և Գյումրիում ՔՊ-ին հաղթանակած կուսակցություններին ու դաշինքներին:

ՔՊ-ին մերժելը շարունակվում ու խորանում է»: