Հայկ Ղազարյանն առաջադրվում է ագրարայինի ռեկտորի մրցույթում

Տեխնիկանական գիտությունների թեկնածու, դոցենտ Հայկ Ղազարյանը հայտարարել է Հայաստանի ազգային ագրարային համալսարանի ռեկտորի պաշտոնում առաջադրվելու մասին: Ղազարյանն ֆեյսբուքի իր էջում մասնավորապես գրում է.

«Հարգելի գործընկերներ, սիրելի ընկերներ,

Խորը պատասխանատվությամբ և վճռականությամբ որոշել եմ առաջադրվել «Հայաստանի ազգային ագրարային համալսարան» հիմնադրամի ռեկտորի թեկնածու սույն թվականի մարտի 19-ին կայանալիք ռեկտորի թափուր պաշտոնի համար հայտարարված մրցույթին:

Ագրարային համալսարանում տեղի ունեցող և ստեղծված իրավիճակը պահանջում են հրատապ հետևություններ անել բուհի անցյալի, ներկայի և ապագայի վերաբերյալ: Դա ինձ պարտավորեցնում է շարունակել պայքարը ագրարային համալսարանի վերածննդի և ապագայի հանդեպ, հանուն Հայաստանի Հանրապետության:

Վճռականությամբ ու եռանդով պատրաստ եմ իմ տասնամյակների փորձը, գիտելիքը, հմտությունները, կապերը անմնացորդ ծառայեցնել առկա բոլոր խնդիրների լուծմանը:

Երբևէ չզբաղեցնելով պաշտոններ և դրա կարիքը չունենալով, երբեք չեմ գայթակղվել դրանցով, սակայն ներկայումս ստեղծված իրավիճակում չեմ կարող կողմնակի դիտորդի կարգավիճակում տեսնել իմ կրթօջախի կործանումը, հետևաբար պատրաստ եմ անմնացորդ նվիրումով ծառայել իմ բուհին և հասցնել այն այնպիսի մակարդակի, երբ այնտեղ սովորում էին հազարավոր ուսանողներ, ովքեր ներկայումս մեր ագրարային ոլորտի առաջատարներն են: Սակայն այսօր մտահոգիչ է, որ ագրարային ոլորտի հնաբնակներին փոխարինողներ ուղղակի չկան: Եվ դա մեր բոլորի լուծելու խնդիրն է, որն էլ պատրաստ եմ իրականացնել:

Ձեր աջակցությամբ ու վստահությամբ պատրաստ եմ համագործակցել բոլոր շահագրգիռ անձանց հետ, ովքեր մտահոգ են ագրարային համալսարանի ապագայի հանդեպ:

Հարգանքով,
ՀԱՅԿ ՂԱԶԱՐՅԱՆ»;