Ուկրաինան Կանադայից կստանա NASAMS հակաօդային պաշտպանության համակարգը

Կանադայի կողմից գնված NASAMS հակաօդային պաշտպանության նորագույն համակարգը շուտով կտեղափոխվի Ուկրաինա։ Այս մասին Օտտավայում հայտարարել է Կանադայի պաշտպանության նախարար Բիլ Բլերը, փոխանցում է Укринформ․

«Մենք սերտորեն աշխատել ենք ամերիկացիների և արտադրող Raytheon-ի հետ՝ այս համակարգը հավաքելու և այն մատակարարելու համար: Այն այժմ Լեհաստանում է և շուտով պետք է տեղափոխվի սահմանով»,- ասել է Բլերը։

Նա նշել է, որ Կանադայի վարչապետ Ջասթին Թրյուդոն ավելի վաղ հեռախոսազրույց է ունեցել Վլադիմիր Զելենսկու հետ՝ տեղեկացնելով նրան NASAMS-ի մոտալուտ ժամանման մասին։

«Մենք աշխատում ենք ուկրաինացիների հետ՝ Կանադայի կողմից գնված այս համակարգը Ուկրաինային հնարավորինս արագ առաքելու համար: Ակնկալում եմ, որ շուտով շատ ավելին կկարողանանք ասել», - նշեց նախարարը։

Հիշեցնենք, որ Կանադան անցյալ տարի միացել էր ԱՄՆ-ի կողմից 10 NASAMS համակարգերի արտադրության պատվերին։ Ավելի վաղ Վլադիմիր Զելենսկին հայտարարել էր NASAMS-ի մեկ նոր համակարգի մուտքի մասին Ուկրաինա մինչև այս տարվա վերջ։