Իշխող ՔՊ-ական խունտայի մոտ սովամահության դեպքեր չեն գրանցվել, նրանց մոտ պատերազմ չկա. նրանք ստացել են կյանքից ամեն ինչ․ Մհեր Մելքոնյան

Երկրում տեղի ունեցող շատ բաներ ինձ համար բացատրություն չունեն։

Ինչո՞ւ հիմա, երբ Արցախը շարունակում է մնալ շրջափակված,երբ մեր զույգ հանրապետությունները կանգնած են լուրջ մարտահրավերների առաջ, երբ արցախահայերն ամենօրյա ռեժիմով կռվում են, հարկ եղած դեպքում՝ զոհաբերության գնում անկախ և անվտանգ ապրելու համար, թիկունքում գրեթե ամեն օր անդադար մրցույթների, փառատոների ու զվարճությունների անվերջ շարան է անցկացվում։

Ի վերջո, ամեն շաբաթ գինու փառատոն, հետո գարեջրի, հետո խաշլամայի, հետո ուրախ ցատկում են միջերկրական ծովափին, այնուհետև այն փոխարինվում է ինչ-որ քայլած չինովնիկի որդու հարսանիքի, հետո անորոշ խաղեր, հետո գեղեցկության մրցույթներ, հետո պիղծ երաժիշտների համերգներ, հետո էլի փառատոն, համերգ, հարսանիք․․․

Եվ այսպես շարունակ ու անվերջ:

Հսկայական (նորից մեր՝ ՀՀ-ի քաղաքացիների) փողեր են ծախսվում, հազարավոր հաշվետվություններ են գրվում, ատկատներ, և այլն․․․

Ի վերջո գումարների մեծ մասը հայտնվում է կազմակերպիչների ու պաշտոնյաների գրպանը։

Այնպիսի տպավորություն է, որ սա հիստերիկ փորձ է՝ թաքնվելու իրականությունից, այն բանից, թե ինչպես են ապրում հասարակ մարդիկ։

Այն, ինչ չենք տեսնում, գոյություն չունի: Այս կարգախոսով են արդեն հինգ տարի աշխատում թշնամու շահերը սպասարկող «հեղափոխականները»։

Եվ նորից հրավառություն, ուրախ երաժշտություն, զվարճալի մրցույթներ, գիշերային փառատոններ․․․

Իշխող ՔՊ-ական խունտայի մոտ սովամահության դեպքեր չեն գրանցվել, նրանց մոտ պատերազմ չկա։

Նրանք ստացել են կյանքից ամեն ինչ․․․

Մհեր Մելքոնյան

ՀՅԴ Շիրակի Մարզային կոմիտեության ներկայացուցիչ