Երուսաղեմում տեղի է ունենում բողոքի բազմահազարանոց ակցիա դատական բարեփոխման դեմ

Տասնյակ հազարավոր մարդիկ հուլիսի 22-ի երեկոյան Երուսաղեմում մասնակցում են Կնեսետի (խորհրդարան) մոտ տեղի ունեցող բողոքի քայլերթին դատական բարեփոխման դեմ, տեղեկացրել է ՏԱՍՍ-ը։

Երեքշաբթի Թել Ավիվում սկսված բողոքի քայլերթը շաբաթ օրը հասել է Երուսաղեմ։ Մարդիկ շարասյուներով քաղաքի մուտքից, որտեղ գտնվում է ավտոբուսների կենտրոնական  կանգառը, շարժվում են դեպի խորհրդարան։ Ոստիկանությունը փակել է մի քանի փողոցներ եւ հրապարակներ, քաղաքում ձեռնարկվել են անվտանգության ուժեղացված միջոցներ։

Կնեսետի շենքի մոտ ցուցարարները մտադիր են վրանաճամբար խփել անորոշ ժամանակով։ Ակցիան սկսվել է դատական բարեփոխման մասերից մեկի քվեարկության առիթով, որը, ինչպես սպասվում է, տեղի է ունենալու խորհրդարանում կիրակի օրը։

Ցուցարարները համաձայն չեն Բենիամին Նեթանյահուի կառավարության քաղաքականությանը եւ նրա առաջարկած վերափոխումների պլանին, որը նախատեսում է Գերագույն դատարանի լիազորությունների սահմանափակում եւ գործադիր ճյուղին դատավորների ընտրությունը վերահսկելու իրավունքի տրամադրում։ Այդ պլանը, որն առաջադրել է կառավարությունը տարեսկզբին, հանգեցրել է ընդդիմության բողոքներին, որի կարծիքով՝ բարեփոխումն այդ տեսքով կխափանի դեմոկրատիայի հիմքերը։ Արդեն 29-րդ շաբաթն է՝ ցույցերը չեն դադարում։