Արցախն այսօր ընդվզեց, ճիշտ այնպես, ինչպես 1988-ի փետրվարի 20-ին. Արթուր Խաչատրյան

Արցախյան շարժումով անկախացավ Հայաստանը

Արցախյան շարժումով կփրկվի Հայաստանը

Թորքի թնդանոթի նշանառության տակ ապրող արցախցի հայը հասկանում է ինչ ասել է թորքի, ադրբեջանցու խոստացած խաղաղությունը։ Հայաստանի նախկին սովետական հատվածի հայը դեռ հավատում է այդ ստին։

Արցախն այսօր ընդվզեց, ճիշտ այնպես ինչպես 1988-ի փետրվարի 20-ին։ Արցախի ազգային ժողովը հայտարարություն է ընդունել․

«Արցախը երբեք չի եղել և չի լինելու անկախ Ադրբեջանի կազմում: Հենց այս գաղափարը պետք է լինի ադրբեջանա-ղարաբաղյան հակամարտության կարգավորման հիմքում:

Ցանկացած փորձ՝ Արցախը բռնակցելու Ադրբեջանին, կհանդիսանա միջազգային իրավունքի կոպտագույն խախտում հայ ժողովրդի նոր ցեղասպանության իրագործման պաշտոնական արտոնագիր, հետևաբար նման բովանդակությամբ փաստաթղթերը Արցախի Հանրապետության համար անընդունելի են:

Հայաստանի Հանրապետության ոչ մի իշխանություն իրավունք չունի հրաժարվելու Արցախի ժողովրդի անվտանգությունն ապահովելու առաքելությունից կամ ընդունելի համարելու որևէ փաստաթուղթ, որտեղ ինքնիշխան Արցախի Հանրապետության գոյությունը կասկածի տակ կդրվի: Պահանջում ենք Հայաստանի Հանրապետության իշխանություններից` միջազգային հարթակներում հանդես գալ հայկական երկու հանրապետությունների միասնական շահերը պաշտպանելու դիրքերից՝ հիմք ընդունելով առկա հիմնարար փաստաթղթերը, մասնավորապես՝ Հայաստանի Հանրապետության Անկախության հռչակագիրը և Գերագույն խորհրդի 1992 թվականի հուլիսի 8-ի պատմական որոշումը:»

1988-ին Սովետական Հայաստանի կոմունիստ առաջնորդներն էլ որոշեցին հանուն սովետական ժողովուրդների բարեկամության ուրանալ ու դավաճանել արցախցիներին և ․․․․ նետվեցին պատմության աղբանոց։ Նույնը կլինի հայաստանյան ցանկացած իշխանության հետ։

Արթուր Խաչատրյան

ՀՅԴ անդամ

ՀՀ ԱԺ «Հայաստան» խմբակցության պատգամավոր