Թուրքիայի նախկին վարչապետ Բինալի Յըլդըրըմը Արցախում վթարի է ենթարկվել

Հինգշաբթի երեկոյան Արցախից օկուպացված Կովսականի շրջանում ավտովթար է տեղի ունեցել Թուրքիայում իշխող «Արդարություն և զարգացում» կուսակցության փոխնախագահ Բինալի Յըլդըրըմի և պատգամավոր Շամիլ Այրըմի մասնակցությամբ։ Նրանք երկուսն էլ ուղղաթիռով տեղափոխվել են Բաքվի կլինիկաներից մեկը. հոկտեմբերի 20-ին հայտնել է թուրքական TRT հեռուստաալիքը։

Բինալի Յըլդըրըմը և Շամիլ Այրըմը նախագահ Էրդողանին ուղեկցել են Ադրբեջան կատարած այցի ժամանակ։ Թուրքական պատվիրակությունը ժամանել է՝ մասնակցելու Արցախից օկուպացված տարածքներում այսպես կոչված «Զանգիլանի» միջազգային օդանավակայանի և հարևան Ջրականի մի շարք օբյեկտների բացման արարողությանը։ Վթարը տեղի է ունեցել այցի ավարտից հետո, երբ պատվիրակությունը Ջրականից ուղեւորվում էր Կովսական։

Թուրքիայի առողջապահության նախարար Ֆահրեթթին Քոջան Twitter-ի իր միկրոբլոգում գրել է, որ տուժածների հետ հեռախոսով խոսել է, և նրանց վիճակը բավարար է. հայտնում է TRT-ն։ Վթարի պատճառները չեն հաղորդվում։

Հիշեցնենք, որ Բինալի Յըլդըրըմը Թուրքիայի վարչապետի պաշտոնը զբաղեցրել է 2016-2018 թվականներին, այնուհետև եղել է երկրի խորհրդարանի՝ Թուրքիայի Ազգային մեծ ժողովի նախագահը։