Բինալի Յըլդըրըմը հրաժարական է տվել

Երեկ երեկոյան հրաժարական է տվել Թուրքիայի Ազգային մեծ ժողովի նախագահ Բինալի Յըլդըրըմը` հրաժեշտի ընթրիքի ժամանակ: Հրաժարականի նպատակը մարտի 31-ին նախատեսված ՏԻՄ ընտրություններին մասնակցելն է. Յըլդըրըմն առաջադրված է «Արդարություն և զարգացում» կուսակցության կողմից Ստամբուլի քաղաքապետի պաշտոնում. հայտնում է gazeteduvar.com.tr կայքը:

Որպես խորհրդարանի ամենատարեց անդամ` Ազգային մեծ ժողովի նախագահի պաշտոնակատար է դարձել «Ազգայնական շարժում» կուսակցության անդամ Ջելալ Ադանը:

Ազգային մեծ ժողովի նախագահի ընտրությունը նախատեսված է փետրվարի 24-ին: Նախագահ է ընտրվում 400 և ավելի ձայն հավաքած թեկնածուն, իսկ ընտրության` երրորդ փուլ տեղափոխվելու դեպքում նվազագույն շեմ է համարվում 301 քվեն: