Կարևոր է այս քաղաքացիների մոտ ձևավորել հավատ և վստահություն, որ իշխանափոխությունից հետո ՀՀ-ն ու Արցախը վերականգնելու են իրենց արժանապատվությունը. Մինասյան

Ակնհայտ է, որ ընդդեմ դավաճանների քաղաքացիների թիվը չափազանց շատ է, որոնք «Դիմադրության շարժման» շրջանակներում ակտիվորեն դուրս էին գալիս փողոց, սակայն շատ կարեւոր է այս քաղաքացիների մոտ ձեւավորել հավատը եւ վստահությունը, որ իշխանափոխությունից հետո Հայաստանն ու Արցախը վերականգնելու են իրենց արժանապատվությունը, այլեւ գալու է  իշխանության մի ազգային հավաքական, որը գիշերուզօր մտածելու է մեր պետականության հզորացման մասին: Այս մասին այսօր՝ սեպտեմբերի 21-ին, «Հայաստանի իրական օրակարգը» խորագրով քննարկման ժամանակ նշեց ԱԺ «Հայաստան» խմբակցության պատգամավոր, ՀՅԴ ԳՄ անդամ Արծվիկ Մինասյանը:

«Ուզում եմ արժեւորել այստեղ հնչած մի շարք առաջարկներ. Արտակ Զաքարյանի առաջարկը ազգային անվտանգության նոր ռազմավարության մշակման վերաբերյալ: Դա անհրաժեշտություն է: Երկրորդ կարեւոր առաջարկը առաջարկների դետալացումն է: Որքան էլ առաջնային է իշխանափոխությունը, չափազանց կարեւոր է ըստ ուղղությունների մարդկանց բացատրել, թե ինչպես ենք մենք տեսնում Հայաստանի փրկությունը: Անվտանգության բոլոր բաղադրիչները՝ սկսած ռազմական անվտանգությունից, ռազմական պաշտպանության, դիվանագիտական անվտանգության կոնցեպտներով, տնտեսական, մշակութային, հոգեւոր, իրավական բոլոր ուղղություններով մենք պետք է ճանապարհային քարտեզ մշակենք ու դնենք սեղանին: Բոլորին պետք է ներկայացնենք, թե ինչ Հայաստան ենք մենք պատկերացնում»,-ասաց նա: 

Արծվիկ Մինասյանը նկատեց, որ իբրեւ ընդդիմադիր խմբակցություններ իրենք փորձել են առաջ տանել իրենց գաղափարները, հանդես են եկել տարբեր նախաձեռնություններով ու առաջարկներով, բայց հանրությունը տեր չի դարձել այդ առաջարկներին ու գաղափարներին. «Հետեւաբար, պետք է բացատրենք հանրությանը, դետալացված ներկայացնենք ամեն բան: Մեր պայքարը չի կարող արդյունք ունենալ, եթե մեր քաղաքացիների, մեր ժողովրդի աչքերը մինչեւ վերջ չեն բացվել, որ սա իշխանության համար պայքար չէ, սա հայրենիքի փրկության պայքար է»,-ասաց պատգամավորը:

Նա դիմեց ՍԴ աշխատակազմի նախկին ղեկավար, Լեհաստանում նախկին դեսպան Էդգար Ղազարյանին, որն առաջարկում է  ԱԺ-ում վարչապետի իմպիչմենտի գործընթաց սկսել. «Պարոն Ղազարյան, մենք տեր ենք, ապահովենք 18 պատգամավորի, որ կքվեարկեն իրենց Նիկոլ Փաշինյանի պաշտոնանկությանը: Հենց հիմա սեղմենք ու պաշտոնանկ անենք: Մենք մեր գործիքները պետք է օգտագործենք թիրախային, ճիշտ ժամանակին»,-ընդգծեց ընդդիմադիր պատգամավորը: