Էրդողանը ողջունում է «Զանգեզուրի միջանցքի» բացումը և Հայաստանի ու Ադրբեջանի՝ «խնդիրները լուծելու» ջանքերը

Ղարաբաղում հաղթանակը նշանավորել է Կովկասում նոր դարաշրջանի սկիզբը՝ վերացնելով տարածաշրջանում կայուն խաղաղության և համապարփակ կարգավորման խոչընդոտները․ հայտարարել է Թուրքիայի նախագահ Ռեջեփ Թայիփ Էրդողանը։

Նա գոհունակություն է հայտնել խնդիրների լուծման ուղղությամբ Ադրբեջանի եւ Հայաստանի ձեռնարկած քայլերից։

«Թուրքիան աջակցում է կողմերի ջանքերին՝ ուղղված սահմանային խնդիրների լուծմանը, խաղաղության համաձայնագրի մշակմանը և տրանսպորտային միջանցքների բացմանը։ Այդ ջանքերի հաջող իրականացումը օգուտ կբերի բոլորիս, մեր ամբողջ տարածաշրջանին»,- ընդգծել է Էրդողանը։

Թուրքիայի ղեկավարը ուրախալի է համարել մայիսի 24-ին Հայաստանի և Ադրբեջանի միջպետական սահմանին տեղի ունեցած՝ սահմանային հանձնաժողովների առաջին հանդիպումը՝ նշելով, որ առաջընթաց է գրանցվել Զանգեզուրի միջանցքի հարցում։

«Մենք նույնպես անկեղծորեն շարունակում ենք Հայաստանի հետ հարաբերությունների կարգավորման գործընթացը։ Մենք կշարունակենք ամրապնդել մեր համերաշխությունը Ադրբեջանի հետ՝ հանուն տարածաշրջանային անվտանգության և բարգավաճման», - ասել է Էրդողանը։

Հիշեցնենք, որ պաշտոնական Երևանն իր հերթին բացառում է «միջանցքային» տրամաբանությունը` նշելով, որ բոլոր ճանապարհների վրա պետք է մնա այն երկրի ինքնիշխանությունը, որի տարածքով այն անցնում է: