Սպասում ենք, որ Արթուր Գալեյանին դատարանի դահլիճից ազատ կարձակեն, որովհետեւ էս էն դեպքը չի. Աստղ Գալեյան

Քիչ առաջ խոսել ենք Գարիկ Գալեյանի հետ, վիճակը կայունացել է, այսօր էլ դեռ կմնա հիվանդանոցում: Այս մասին, այսօր՝ մայիսի 19-ին, դատարանի բակում լրագրողների հետ զրույցում նշեց 44-օրյա պատերազմում զոհված Մխիթար Գալեյանի մայրը՝ Աստղիկ Գալեյանը:

Նշենք, որ այս պահին դատարանը քննում է Աստղիկ Գալեյանի ամուսնու եղբոր՝ Արթուր Գալեյանի կալանավորման հարցը:

«Սպասում ենք, որ դատարանի դահլիճից ազատ կարձակեն, որովհետեւ էս էն դեպքը չի, որ պետք է կալանքի տանեն: Եթե այդպես լիներ, պատերազմից հետո շատ-շատ հրամանատարներ, սպայական կազմից շատ մարդիկ լիքը փաստեր կան, որ մեղավոր են, թողել են զինվորներին: Նրանք ազատության մեջ են, նույնիսկ աշխատում են, ավելի բարձր պաշտոններ են զբաղեցնում: Եթե նրանք ազատության մեջ են, ամուսնուս եղբայրը եւս պետք է լինի ազատության մեջ.,-ասաց տիկին Աստղիկը:

Նա նշեց, որ իրենք չեն իմացել, որ դա զորամասի շենք է. «Ինչ որամաս, եթե մենք մայիսի 17-ին էնտեղ ենք եղել, անգամ բարձրացել ենք շենք, մեր ծնողներից մեկը այնտեղ կաբինետ ուներ, նստել, հանգստացել ենք, չենք իմացել, որ դա զորամաս է համարվում: Մուտք ու ելքը ազատ է եղել»:

Հիշեցնենք, որ քրեական գործը հարուցվել է N զորամաս ապօրինի մուտք գործելու, հրամանատարի տեղակալի նկատմամբ առերևույթ բռնություն գործադրելու, ծանր վիրավորանք հասցնելու  դեպքերի հետ կապված:

ՔԿ հաղորդագրության համաձայն, նախնական տվյալներով, 2022թ. մայիսի 17-ին՝ ժամը 14:05-ի սահմաններում, մի խումբ անձինք, սահմանված կարգի խախտմամբ, մուտք են գործել ՀՀ ՊՆ N զորամասի տարածք, որի ընթացքում չենթարկվելով զորամասի տարածքը լքելու՝ զորամասի հրամանատարի սպառազինության գծով տեղակալ, գնդապետի օրինական պահանջին, ծառայողական պարտականությունները կատարելու կապակցությամբ, հայհոյել են, քաշքշել և բռնություն գործադրել նրա նկատմամբ՝ պլաստմասե շշով հարվածելով դեմքին:

Նախաքննության ընթացքում պարզվել են իշխանության ներկայացուցչի նկատմամբ առերևույթ բռնություն գործադրած և ծանր վիրավորանք հասցրած անձանցից երեքի ինքնությունը, ովքեր Գարիկ և Արթուր Գալեյան եղբայրներն են, ինչպես նաև՝ քաղաքացի Ազգուշ Մարտիրոսյանը:

Տես նաեւ՝ Գարիկ Գալեյանի առողջական վիճակը կայուն ծանր է. փաստաբան: