Չինաստանն ԱՄՆ-ին կոչ է անում զգույշ լինել Թայվանի վերաբերյալ արտահայտություններում

Վաշինգտոնը պետք է զգույշ լինի Թայվանի վերաբերյալ իր արտահայտություններում և գործողություններում, որպեսզի լուրջ վնաս չհասցնի Չինաստանի և ԱՄՆ-ի հարաբերություններին. հայտնում է ՏԱՍՍ-ը՝ վկայակոչելով ԱՄՆ-ում Չինաստանի դեսպանատան խոսնակ Լյու Պենգյուին։

Նա այսպես է արձագանքել ԱՄՆ պետքարտուղար Էնթոնի Բլինքենի այն հայտարարությանը, թե ԱՄՆ-ը մտադիր է Թայվանին ապահովել ամեն ինչով Պեկինի միակողմանի քայլերի դեպքում պաշտպանվելու համար։

Ըստ Պենգյուի՝ Թայվանի հարցը Չինաստանի ներքին գործն է և արտաքին միջամտությունն անթույլատրելի է։

«Մենք կոչ ենք անում Միացյալ Նահանգներին՝ հավատարմորեն պահպանել «Մեկ Չինաստան» սկզբունքը և Չինաստան-ԱՄՆ երեք համատեղ կոմյունիկեների դրույթները, նաև զգույշ լինել Թայվանի մասին իրենց խոսքերում և գործողություններում», - ասել է դիվանագետը:

Հիշեցնենք, որ ԱՄՆ Կոնգրեսի պատվիրակության վերջին այցը Թայվան նույնպես նպաստեց իրավիճակի սրմանը։ Երկրորդ բացասական դրվագը ՆԱՏՕ-ի անդամ Լիտվայում Թայվանի ներկայացուցչության բացումն է։