ՏԵՍԱՆՅՈՒԹ․ Այս սուբյեկտների նպատակը Հայաստանը մենակ թողնել, Արցախը թշնամուն հանձնելն է․ Թաթուլ Պետրոսյան

Այս սուբյեկտների նպատակը Հայաստանը մենակ թողնել, Արցախը թշնամուն հանձնելն է՝ ըստ Yerkir.am-ի ասաց արդարադատության գեներալ-մայոր Թաթուլ Պետրոսյանը։

Նա «Մայր Հայաստան» հուշահամալիրում է՝ մասնակցելու ի պաշտպանություն հայ-ռուսական բարեկամության, արցախահայության  անվտանգության միջոցառմանը, որը նախաձեռնել են «Պահեստազորի սպաների» շարժումը, «ԱԱԾ պահեստազորի սպաներ» ՀԿ-ն, «Ձայն հայրենեաց» Հայ մտավորականների նախաձեռնությունը, «Հայոց Ազգային Գվարդիան», «Հայրենիքի Վահան» պահեստազորի սպաների ՀԿ-ն, «Ղարաբաղի պատերազմի վետերանների միություն» ՀԿ-ն, «Իրավունքի և արժեքների գերակայություն» իրավապաշտպան ՀԿ-ն, «Վերադարձ» հիմնադրամը։

«Աշխարհաքաղաքական այս իրավիճակում մեր դավաճան իշխանությունները ամբողջությամբ մեզ զրկեցին մեր ռազմավարական բոլոր դաշնակիցներից։ Այսօր սորոսական և իշխանական կողմից կերակրվող և հովանավորվող ուժեր կան, ես կնշեմ նաև «Ազգային ժողովրդավարական բևեռը», ովքեր փորձում են սեպ խրել հայ-ռուսական բարեկամության մեջ, նրանք նույնիսկ հասել են այն կետին, որ պնդում են, որ խաղաղապահ ուժերը պետք է դուրս բերվեն մեր Արցախի տարածքից։ Սա ես գնահատում եմ որպես դավաճանություն հայ ազգի նկատմամբ»,-ասաց Թաթուլ Պետրոսյանը։

Նա նշեց, որ հիմա իշխանությունները որոշել են խղճուկ հոգեբանությամբ խաղաղության դարաշրջան բացել թուրքերի ու ադրբեջանցիների հետ։

« Պարտված սուբյեկտը ողորմություն է խնդրում հաշտության։ Եվ եթե հանկարծ խաղաղության դարաշրջան սկսեն և Թուրքիայի ու Ադրբեջանի հետ  տարածքային ամբողջականության պայմանագրեր ստորագրեն, պատկերացրեք այդ պայմաններում դեմարկացիա և դելիմիտացիայի առումով Արցախն ամբողջությամբ մնում է Ադրբեջանի տարածքում։ Այս պարագայում ռուսական ուժը տարածաշրջանում գտնվելու անելիք չունի»,-ասաց Թաթուլ Պետրոսյանը։  

Մանրամասն՝ տեսանյութում․