Թուրքիան դիտարկում է Սիրիայի կառավարության հետ երկխոսություն սկսելու հնարավորությունը․ ԶԼՄ

Թուրքիայի կառավարությունը դիտարկում է Սիրիայի կառավարության հետ երկխոսություն սկսելու հնարավորությունը, հայտնում է Hürriyet-ը՝ հղում անելով անանուն աղբյուրներին։

Ըստ լրատվամիջոցի՝ քննարկումները կներառեն երեք կարեւոր թեմա՝ սիրիական պետության միասնական կառուցվածքի պաշտպանություն, Սիրիայի տարածքային ամբողջականության պահպանում եւ փախստականների անվտանգ վերադարձի ապահովում։

Սիրիայի միասնությունն առանձնահատուկ նշանակություն ունի երկրում եւ Քրդական ինքնավար մարզում Քրդստանի աշխատավորական կուսակցության (PKK) գործունեության հետ կապված, նշում է թերթը։

Այս գործընթացը կարող է հանգեցնել նրան, որ Թուրքիայում բնակվող սիրիացի փախստականների առնվազն կեսը վերադառնան իր հայրենիք, հայտնում է Hürriyet-ը՝ հղում անելով աղբյուրներից մեկին։

Աղբյուրները նշել են, որ Անկարայի եւ Դամասկոսի միջեւ հարաբերությունները հետաձգվել են Ռուսաստանի եւ Իրանի կողմից։ Բայց քանի որ Ռուսաստանը զբաղված է Ուկրաինայի պատերազմով եւ դրան գլոբալ արձագանքով, հարաբերությունների բարելավման հնարավորություն է ստեղծվել, ասել են նրանք։

Անկարան կարծում է, որ նախագահ Բաշար ալ Ասադի այցը ԱՄԷ ցույց է տալիս, որ նա պետք է հանդես գա նոր նախաձեռնություններով եւ նոր աջակցություն ստանա, եւ որ դրա համար տարբեր միջոցներ են փնտրում։ Աղբյուրների խոսքով՝ Թուրքիան կարող է այդ գործընթացը օգտագործել իր օգտին՝ հաշվի առնելով ԱՄԷ-ի հետ հարաբերությունների բարելավումը։

ԱՄԷ-ի ղեկավարության հետ Ասադի հանդիպումները ազդարարեցին արաբ հարեւանների հետ Սիրիայի հարաբերությունների պոտենցիալ ջերմացման մասին: Միացյալ Նահանգները քննադատել է ուղեւորությունը՝ հայտարարելով, որ ինքը «խորապես հիասթափված է»: