Անկարան բացատրել է, թե ինչպես են «Բայրաքթար»-ները հասել Ուկրաինա

Թուրքիան «Բայրաքթար» անօդաչու թռչող սարքեր (ԱԹՍ) չի փոխանցել Ուկրաինային՝ որպես օգնություն, նա մասնավոր ընկերությունից է գնել. ասել է Թուրքիայի ԱԳՆ փոխարտգործնախարար Յավուզ Սելիմ Քըրանը։

2018-2020 թվականներին Ուկրաինան ներմուծել է «Բայրաքթար» TB2 թուրքական գրոհային անօդաչու թռչող սարքեր, որոնց գինը կազմել է մոտ 74 միլիոն դոլար։ Փետրվարի սկզբին նախագահ Վլադիմիր Զելենսկին ասել էր, որ Ուկրաինան և Թուրքիան համաձայնագիր են ստորագրել երկրում «Բայրաքթար» անօդաչու թռչող սարքերի արտադրությունն ընդլայնելու մասին։

««Բայրաքթարը» մասնավոր ընկերության արտադրանք է։ Ուկրաինան նույնպես ցանկանում էր գնել այս ապրանքը մեր ընկերությունից, և նրանց միջև կնքվեց պայմանավորվածություն։ Նրանք տրամադրեցին այս ապրանքը: Ամբողջ աշխարհում այդպես է։ Այսօր Ռուսաստանը, ԱՄՆ-ն ունեն  ռազմարդյունաբերական համալիրի մասնավոր ընկերություններ։ Դրանք կարող են նման պայմանագրեր կնքել երկրների հետ։ Այս երկրները նրանց ինչ-որ բանի չեն պարտավորեցնում։ Սա Թուրքիայից օգնություն չէ, այլ ապրանքներ, որոնք Ուկրաինան գնել է թուրքական ընկերությունից։ Իհարկե, մենք հպարտանում ենք այս ապրանքներով»,- փոխարտգործնախարարի խոսքերն է մեջբերում Sabah թերթը։