Ուկրաինան կոչ է արել Թուրքիային` փակել Բոսֆորի ու Դարդանելի նեղուցները

Անկարայում Ուկրաինայի դեսպան Վասիլ Բոդնարը կոչ է արել Թուրքիային` փակել նեղուցները ռուսական նավերի համար:

«Մեր զորքերը պայքարում են տարածաշրջանային օկուպանտների դեմ: Այս պահին ամենակարևորը Ուկրաինային աջակցություն ցուցաբերելն է: Այստեղից կոչ եմ անում թուրքական իշխանություններին: Թուրք ժողովրդի՝ ուկրաինական ժողովրդին աջակցությա հույս ունենք: Թուրքիային հանձնել ենք մեր պահանջները` Բոսֆորի ու Դարդանելի նեղուցը փակել ռուսական նավերի համար»,- ասել է նա:

Հիշեցնենք, որ նեղուցների օգտագործման կանոնները սահմանված են Մոնտրյոյի կոնվենցիայով:

Մոնտրյոյի 1936 թ. կոնվենցիան ԽՍՀՄ-ի, Թուրքիայի, Մեծ Բրիտանիայի, Ֆրանսիայի, Բուլղարիայի, Ռումինիայի, Հունաստանի, Հարավսլավիայի, Ավստրալիայի և Ճապոնիայի մասնակցությամբ Շվեյցարիայի Մոնտրյո քաղաքում տեղի ունեցած խորհրդաժողովի արդյունքում ստորագրված կոնվենցիա է, որն իրենց ենթադրում էր, որ բոլոր սևծովյան պետությունների ռազմանավերը (առևտրային և այլ նավերին չի վերաբերում) ազատ կարող են ելումուտ անել Դարդանելի և Բոսֆորի նեղուցներում՝  պայմանով, որ պետք է նախապես դրա մասին տեղեկացնեն թուրքական իշխանություններին: Իսկ ոչսևծովյան պետությունների ռազմանավերի համար կար հստակ սահմանափակում. միայն մանր և ոչ մեծ տարողության ռազմանավերին էր թույլատրված մուտք գործել նեղուցներ (հսկայական ավիակիրներն, անշուշտ, չեն մտնում այդ ցուցակի մեջ): Ի դեպ, Թուրքիան բազմիցս է խախտել այս կոնվենցիայի դրույթները. մասնավորապես, կետերից մեկի համաձայն, եթե Թուրքիան չի մասնակցում պատերազմի, ապա պարտավոր է փակել նեղուցները ցանկացած պետության համար: Երկրորդ աշխարհամարտի ժամանակ Թուրքիան խախտել է այս դրույթը (քանզի պաշտոնապես համարվում էր չեզոք երկիր) և թույլատրել նացիստական նավերի մուտքը Սև ծով: